Inatiri 2. Itala

“Inaahala uthwaa iyoolya.”​—MARKUS 13:8.

● Ilapo yo Nigeria ncoko wo Quaratadji, haavo nlopwana mmoca naavya nipuro nootthawela. Asihimaawe ni asirokorawe, ciicammo ahowaaca atthawacile itala. Masi nlopwanooyo ri veekhaawe ni howiicaatalela wantthattoni. Kontha isiyani? “Uyo khankitiri waalihera [amucyaawe] ni unaamwiira uthunku waaweha,” nohimya nlopwana mmoca neehaniya Sidi, nhooleli oncoko wo Quaratadji.

CITTHU CINKHUMELELA CINTHOONYERA ISIYANI? Ntuninyani motheene, iriyari yaatthu 7, naakhumelela ntthu mmoca hinkitiri uphwanya iyoolya yontosera ulya uyova khula mahuku. Nno nummerunno nintepa winciva u África, uhitto waya nconko wo Saara, nnwo iriyari yaatthu araru naaphwanyannya ntthu mmoca hinlya saana. Wiira mwiiweehe saana iyo itthwiiyo, muupuwele itthoko imphwanyanna alopwana, athiyanana ni mwaana ooyariya naanaano. Yakhalaka iyoolya yowaatosera atthu eeli paasi, tipani nohaala uhilya? Alopwanaayo? Athiyanaayo? Awula mwaanooyo? Iyo piitthu amuci enci owaathwaa iyoolya inlakelakaaya khula nihuku.

ISIYANI ATTHU ENCI ANEERAAYA? Itthaya inaaruwerya icoolya cowaatosera atthu otheene. Icoolyannyo phinlamuliya otafitiya saana.

NIIREKE WIIRA IYO IKHANLE IKHWEELI? Khweeliini anamalima enci pooti uruwerya ni ulovola icoolya cinci uvikana khalayi. Ikuveerno caapinaatamu canhala ukhitiri utafiti icoolya cinruweriyannyo wiira cipice umala, coo canhala okhitiri umaliha itala. Masi, cihooviraru myaakha cinci camananihaka upanka iyo khacikhitinri.

NYUUVA NNOONELA CAANI? Niireke itthu inhimyaaya ilivuru ya Markus 13:8 ineera yiirannyaaka? Uhookhalaru wiira mahukwaala itekonologiya inaavareliya nteko cinene, niireke uthwaa wocoolya uneera waawaanelaka masakha apinaatamu ntuninyani motheene?

Ikwaha cinci, uttettemelaca wotthaya ni itala cinaakhumeleliha citthu coohinamaana cinoonihera wiira ninkhala mahuku ookhicera.

[Moolumo o wapaaginani ootepa woonannya 5]

“Asaana 33% akhwile nlattu wo iretta yo pneunomonia, uharya awula upulukari ni iretta cinkhwaawe khayaahala ukhwa weeriyaka wiira yaanaalya saana.”​—ANN M. VENEMAN, YAARI AHOOLELI OMPHWINKO UNAATAFITI NI ANAAKHIKICERA ASAANA ONTUNINYANI MOTHEENE.

[Mwaneene ilatarato  5]

© Paul Lowe/Panos Pictures