2. Enjara

‘Nihaija kubaho enjara.’​—MAKO 13:8.

● Omushaija akahungira omu kyaro kya Quaratadji, omuri Niger. Abanyabuzaare be, beene ishe, na banyaanya nabo bakaba bahungire omu kyaro kyabo ahabw’enjara. Kwonka hati, omushaija ogu akaba naaraara aha mukyeka wenka ahansi. Ahabw’enki yaabaire ari wenka? “Akaba atarikubaasa kuriisa [eka ye] kandi akaba atarikubaasa kugumizamu naabareeba aha maisho,” Sidi, omwebembezi w’ekyaro kyabo nikwo arikugira.

OBUHAME NIBWOREKA KI? Omu nsi yoona, haihi omuntu nka 1 ahari 7 tarikutunga eby’okurya bya buri izooba ebirikumara. Emihendo egyo omu mahanga agari omu mahamba g’Africa agoomire neekiraho, ahakuba omuntu 1 ahari 3 naaba akuuhwire. Kubaasa kwetegyereza gye emihendo egyo, teekateeka aha ka erimu taata maama, n’omwana. Haaba hariho eby’okurya by’abantu babiri bonka, n’oha orikuba aine kugumira aho atariire? Taata? maama? nari n’omwana? Ebi nibyo amaka nk’ago gaine kucwamu buri izooba.

ABANTU BAINGI NIBAKIRA KUGAMBA KI? Ensi neeyeza eby’okurya birikumara buri omwe. Ekirikwetengyesa kyonka n’okukoresa gye ebiri omu nsi.

EKI BARIKUGAMBA SHI KIHIKIRE? N’amazima, hati abahingi nibabaasa kushohoza eby’okurya bingi kukira ira. Kandi, gavumenti z’abantu zishemereire kuba nizikoresa gye eby’okurya kuhezaho enjara ei abantu baine. Kwonka na bwanyima y’okugyezaho emyaka mingi, na hati bakiremirwe kukikora.

NOOTEEKATEEKA KI? Ebiri omuri Mako 13:8 biriyo nibihikiirizibwa? N’obu haraabe hariho entunguuka omu by’empiinga, mbwenu shi eibura ry’eby’okurya ririyo niriteganisa abantu omu nsi yoona?

Emitsitsa n’enjara nibyo birikukira kubanza omu buremeezi oburi omu kamanyiso k’ebiro by’emperu.

[Ebigambo ebitoorainwe]

“Abaana abarengire kimwe kya kashatu abarikwitwa ebyemerero, ekiirukano, n’ezindi ndwara bakaabaire batarikufa ku ogire ngu nibaba batakuuhwire.”​—ANN M. VENEMAN, OWAABAIRE NAAKURIRA EKITONGORE KY’ESENTE Z’OKUREEBERERA ABAANA OMU MAHANGA AGEETEERAINE.

[Obukomooko bw’ekishushani]

© Paul Lowe/​Panos Pictures