Uchimi 2. Nja

“Kwazamuja nja.”—MARIKO 13:8.

● Munthu munyaki wanguthaŵa nja kwawu ndipu wanguluta kumuzi unyaki wo udanika kuti Quaratadji, ku Niger. Abali ŵaki anyaki nawu anguza kumuzi wenuwu kutuwa kwawu kuthaŵa nja. Kweni munthu uyu wangusanirika kuti wagona yija pamphasa pabwalu. Ntchifukwa wuli wenga yija? A Sidi wo ŵenga afumu a muzi wenuwu angukamba kuti, “Iyu watondeka kusaniriya [banja laki] chakurya ndipu chitima chamuko kuti waŵalereskengi waka achisuzgika.”

KUMBI MAUKABONI NGALONGONJI? Pacharu chosi, zuŵa lelosi munthu yumoza pa ŵanthu 7 waja ndi nja. Chiŵerengeru ichi ntchakukwera ukongwa muvyaru va kumwera kwa chipululu cha Sahara, chifukwa munthu yumoza pa ŵanthu atatu waja kwambula kurya kwa mazuŵa nganandiku. Kuti muvwisi fundu iyi, yeruzgiyani mo vingaŵiya mu banja la ŵanthu atatu. Asani pe chakurya cha ŵanthu ŵaŵi pe, kumbi ndiyani wangaja ndi nja? Ada, ama pamwenga mwana? Mabanja ngaviyo ngakhumbika kusankha venivi zuŵa lelosi.

VO ŴANTHU ANANDI AKAMBA PAKUSUSKA UCHIMI UWU Pacharu chapasi ŵanthu alima vakurya vinandi ukongwa vo vingakwana weyosi. Pakhumbika waka kuvigaŵa mwakwenere.

KUMBI FUNDU YENIYI NJAKUVWIKA? Mbuneneska kuti mazuŵa nganu alimi alima vakurya vinandi ukongwa kuluska kali. Ndipu maboma nga ŵanthu ngakhumbika kugaŵa umampha chakurya kuti nja yimali pacharu chapasi. Chinanga kuti maboma yanga ngayesesa kuchita venivi kwa vyaka vinandi, kweni ngatondeka kumalisa nja.

KUMBI YIMWI MUWONA WULI? Kumbi lemba la Mariko 13:8 lifiskika nadi? Chinanga kuti lusu la vakupangapanga laluta panthazi ukongwa, kumbi muwona kuti nja yeche kusuzga pacharu chosi?

Kweni pe so chakuchitika chinyaki cho chilongo kuti te mu mazuŵa ngakumaliya cho chiluska vidilirisi kweniso nja.

[Fundu yikulu]

“Ŵana anandi wo atufwa chifukwa cha vilasu, kutuliya pamoyu kweniso matenda nganyaki, angachira asani angaŵa ndi chakurya chakukwana muliŵavu mwawu.”—ANN M. VENEMAN, MULONGOZGI WAKALI WA WUPU WA UN CHILDREN’S FUND.

[Mazu ngakukonkhoska chithuzi]

© Paul Lowe/Panos Pictures