2. Owẹnvwe
2. Owẹnvwe
“Ewẹvwe che fi.”—MAK 13:8.
● Ọshare ọvo kua kpo ọko ri Quaratadji vwẹ Niger sẹ ọ sa mrẹ emuọre vwẹ oboyin. Iniọvo rẹ ọshare na je kua no ẹbẹre efa vwẹ ekuotọ na rhe ọko na fikirẹ owẹnvwe vuọvo na. Ẹkẹvuọvo, ọshare na ọvo shevwerhẹ ẹghwẹre vwẹ otafe. Diesorọ ọyen ọvo vwọ hẹ etiyin? Sidi rọ dia osun rẹ orere na da ta: Ọ cha sa ghẹrẹ [orua rọye-en], o ji che se rhe nẹ ayen opharo-o.
DIE YEN IYẸNRẸN NA DJEPHIA? Vwẹ akpọeje, omarẹ ohwo 1 vwẹ usun rẹ ihwo 7 mrẹ emu ro te ayen ria vwẹ ẹdọke-e. Ukeri nana buẹnphiyọ vwẹ sub-Saharan Africa, rọ dia asan rẹ ohwo 1 vwẹ ihwo 3 de jẹ emu ẹmrẹ ria vwẹ uvwre rẹ ọke ogrongron. E vwo vwẹ ẹruo rẹ obo ra ta na, vwẹ ẹwẹn roro orua rẹ ọsẹ, oni vẹ omotete hepha. Ọ da dianẹ emu rẹ ihwo ivẹ cha re ọvo yen ayen vwori, kẹ onọ yen che jẹ emu ẹriọ? Ọsẹ na, oni na gbanẹ omotete na? Ọna yen oborẹ erua evo hirharokuẹ kẹdẹ kẹdẹ.
DIE YEN IHWO TA? A sa mrẹ emu buebun rẹ ihworakpọ eje cha re vwẹ akpọ na. Ẹkẹvuọvo, obo ra sa vwọ nabọ gharọ ro se vwo te ihwo eje yen a guọnọre.
OBORẸ AYEN TA NA UYOTA? Vwọrẹ uyota, eghwẹrẹ sa wiowian ra vwọ mrẹ emuọre buebun enẹna vwọ vrẹ ọke ri jovwo. Obo ri me yovwin jovwo, yen igọmẹti vwọ nabọ ghare emuọre re vwori vwọ kẹ ihwo eje owẹnvwe vwo no. Ẹkẹvuọvo, ẹgbaẹdavwọn rẹ ayen ruru ayen se vwo ru ọnana vwẹ ikpe buebun rhire na shefia.
DIE WO RORORI? Obo rehẹ Mak 13:8 ruẹgba re? Ọ vwọ dianẹ ena kpokpọ buẹnphiyọ kẹdẹ kẹdẹ na, ihwo ji hirharokuẹ ọkanrovwẹ rẹ emu vwẹ akpọeje nọnẹna?
Etọ re bẹrẹ vẹ owẹnvwe sua ebẹnbẹn efa vwẹ akpọ na re je dia eka rẹ ẹdẹ re koba na.
[Ẹkpo rọ teyenphia vwẹ aruọbe 5]
“Ọ da dianẹ ẹbẹre ọvo rẹ ẹkẹn erha rẹ emọ ri ghwẹ fikirẹ ọga rẹ pneumonia, diarrhoea vẹ ega efa nabọ mrẹ omamọ emu ria, ayen rhe ghwu-u.”—ANN M. VENEMAN RỌ DIA OCHIDIAGBARA RỌ VWẸROTE UN CHILDREN’S FUND JOVWO.
[Asan rẹ Ifoto Nurhe rọhẹ aruọbe 5]
© Paul Lowe/Panos Pictures