Eprofesia 2. Etala

“Enoothowaka yoolya”.—MARKO 13:8.

● Mulopwana mmosa a muttetthe wa oQuaratadji, oNigéria aaphavela opuro wookhala. Axihima awe ni axirokorawe yaahirowa okhala opooma athyawaka etala. Masi mulopwana ole aahanle mekhawe ampaathale ene vattheereni. Exeeni yaamwiirinhe okhala mekhawe? Mukhulupale a muttetthe ole oniihaniwa Sidi ohimmye so: “Owo khaawerya waavaha yoolya atthu a [etthoko awe] ni khaaphavela waaweha avoliwe ene etala”.

ITTHU SINCEENE SINOONIHERYA EXEENI? Olumwenku wotheene, eriyari ya atthu 7 mutthu mmosa paahi toniwerya ophwanya yoolya ya khula nihiku. Nummuru nno ninnitepa wuncerereya ilapo soohaawa sa wÁfrica. Ilapo iyo, eriyari ya atthu 3 mutthu mmosa khonikhalana yoolya. Wira niiwexexe nkahaya muupuwele emusi okhanle paapa, maama ni mwanaya. Okhala wira khekhanle yoolya enaaphiyerya atthu otheene, tani ohinrowa olya? Paapa? Maama? Wala mwaana? Eyo yoothanla imusi sinceene sinipaka aya khula nihiku.

ATTHU AKINA ANIHIMYA EXEENI? Elapo enniwerya okumiherya yoolya enaaphiyerya atthu otheene. Nto itthu sikhanle valaponi sihaana okaiwa mwa enamuna yooloka.

NIIREKE ITTHU IYO ANIHIMYA AYA TI SEKEEKHAI? Ekeekhai wira alimi anniwerya oruwerya yoolya yinceene. Nto ikuvernu sanwerya okawa saana soolya iyo elapo enikumiherya aya ni omaliha etala. Masi nnaamwi akhumme ene khalai weererya opaka eyo, awo khawenrye.

NYUWO MUNOONELA SAI? Niireke eprofesia eri Marko 13:8 enniiraneya? Nnaamwi etekonologia ekenle ene vahoolo, etala enniwiiva atthu anceene olumwenku wotheene.

Ikwaha sinceene itetere ni etala sinnikumiherya mixankiho sikina sinooniherya wira ninkhala mahiku ookiserya.

[Eponto yuulupale epaaxina 5]

“Anamwane anceene annookhwa mwaha wa iphumu, ovaluwa, ni iretta sikina sinikhumelela mwaha woohilya saana”.—ANN M. VENEMAN. EX-DIRETORA EXECUTIVA DO FUNDO DA ONU PARA A INFÂNCIA.

[Masu a Elatarato ya Epaaxina 5]

© Paul Lowe/Ifootu ni Ilatarato