2. Sala

“Tikuchiŵa kwana sala.”​—MALIKO 13:8.

● Jwamlume jwine jwayiche m’musi wa Quaratadji, ku Niger pakutila sala kumangwakwe. Ŵachibale ŵakwe ŵayichesoni mmusiwu kuti apate yakulya. Nambo jwamlume jula ŵasimanikwe ali agonile pa mkeka jikajikape. Ligongo chichi ŵasimanikwe ali jikajikape? Mwenye jwa m’musimo lina lyakwe Sidi jwasasile kuti, “Jwamlumeju jwalepelaga kulipatila yakulya liŵasa lyakwe soni nganasakaga kuti ŵawoneje ŵandu ŵa mwiŵasa mwakwe pakuwa ni sala.”

ANA MAUMBONI GAKULOSYA YAMTULI? Pachilambo chosope, mundu jumo pa ŵandu 7 ŵaliwose akusalepela kupata yakulya yakwanila lisiku lililyose. Yeleyi yikutendekwa mnopemnope ku yilambo yejinji ya ku Africa kwele mundu jumo pa ŵandu ŵatatu ŵaliwose akusalaga ni sala. Kuti tupikanichisye yeleyi, kwende tuwanichisye kuti mwiŵasa mwana jwamlume, jwamkongwe ni mwanache. Ana muliŵasa lyeleli naga mwana yakulya yakwanila ŵandu ŵaŵilipe, ana ŵani ŵampaka agone ni sala? Ana mpaka aŵe jwamlume, jwamkongwe kapena mwanachejo? Liŵasalyo ni lyalikwete udindo wakusagula mwakamulana ni mwayiŵelele yindu palisikulyo.

ANA ŴAKUSISYA AKUSASALA YAMTULI? Pachilambopa pana yakulya yakwanila jwalijose. Chakusosekwa ni chakuti tukamulichilisyeje chenene yindu yayipaliyo kuti tupateje yakulya.

ANA YAKUSALA ŴAKUSISYAŴA YISYENE? Yisyene kuti apano alimi mpaka agowole yakulya yejinji ni kuyitumisyaga m’madela gane pachilambopa kupundana ni kala kose. Myoyo maboma gakusosekwa kukamulichisya masengo yakulya yeleyi pakumasya sala pachilambopa. Nambope, atamose kuti alinjile kwa yaka yejinji kutenda yeleyi nambo alepele kumasya sala.

WAWOJO AKUGANISYA WULI? Ana lilemba lya Maliko 13:8 likukwanilichikwa? Atamose kuti yindu yasayansi yipite pasogolo, ana ŵandu ngakulagape ni sala pachilambopa?

Ndaŵi syejinji yisichinya soni sala yikusatandisya yakusawusya yine yayilisoni mbali jine ja yimanyisyo ya masiku gambesi.

[Maloŵe Gagombelechesya pa peji 5]

“Ŵanache ŵajinji ŵakusawa ni chibayo, kuwugula m’matumbo soni yilwele yine komboleka kuti ŵane mwa jemanjaji akalamaga yikaŵe kuti akusalya yakulya yakwanila.”—ANN M. VENEMAN, JUŴALIJI JWAMKULUNGWA JWA GULU JAKULOLA YA ŴANACHE PACHILAMBO CHOSOPE.

[Picture Credit Line on page 5]

© Paul Lowe/Panos Pictures