Kiraya kuma 3nan. Bana

‘Bana juguw . . . na kɛ yɔrɔ caman na.’—LUKA 21:11

● Bonzali tun ye dɔgɔtɔrɔ ye farafinna jamana dɔ la kɛlɛ kɛlen bɛ ka tiɲɛni kɛ yɔrɔ min na. A tun bɛ k’a seko bɛɛ kɛ walasa ka damanda baarakɛlaw furakɛ Marburg farigan tun bɛ minnu na. A tun ye dɛmɛ ɲini duguba dɔ ɲɛmɔgɔw fɛ nka a ma dɛmɛ sɔrɔ joona. Kalo naani o kɔfɛ, dɛmɛ sɔrɔla nka o y’a sɔrɔ Bonzali sara ka ban. Marburg farigan y’a minɛ, k’a faga a kɛtɔ ka damanda baarakɛlaw furakɛ.

KO KƐLENW BƐ MUN JIRA? Bana dɔw i n’a fɔ fogonfogon dimin, kɔnɔboli, sida, sɔgɔsɔgɔninjɛ ani sumaya, olu bɛ banaw cɛma minnu bɛ fagali kɛ kosɛbɛ. San dɔ la, o bana duuru ninnu ye mɔgɔ 10 700 000 ɲɔgɔn de faga. O b’a jira ko o san mumɛ bɛɛ kɔnɔ, sekondi saba tun mana dafa tuma o tuma, mɔgɔ kelen tun bɛ sa.

SƆSƆLI KUMA JUMƐN BƐ FƆ O KO LA? Ikomi mɔgɔw bɛ ka caya diɲɛ kɔnɔ ka ta’a fɛ, banabagatɔw fana bɛ ka caya ka ta’a fɛ. O kɔrɔ ye ko banaw bɛ se ka mɔgɔ minnu sɔrɔ, o hakɛ bɛ ka caya.

YALA O SƆSƆLI KUMA IN BƐNNEN DON WA? Tiɲɛ don ko mɔgɔw ka ca dugukolo kan kosɛbɛ. Nka mɔgɔw ka dɔnniya fana bonyana kosɛbɛ ka ɲɛsin banaw ma, u bɛ se ka banaw ye ka u furakɛ ani ka u kɛlɛ cogo ɲuman na sisan ka tɛmɛn fɔlɔ kan. O la, yala banaw man kan ka dɔgɔya diɲɛ kɔnɔ wa? Nka an ɲɛ b’a la ko u bɛ ka caya ka ta’a fɛ de.

I HAKILINA YE MUN YE? Yala bana juguw bɛ ka mɔgɔw minɛ iko Bibulu tun y’a fɔ cogo min na wa?

Dugukolo yɛrɛyɛrɛw, kɔngɔ ani bana, olu ye fɛnw ye minnu bɛ ka mɔgɔ miliyɔn caman faga. Mɔgɔ wɛrɛw tɔɔrɔlen don u mɔgɔɲɔgɔnw ka kɛwalew kosɔn, tuma dɔw la minnu yɛrɛ ka kan ka u janto i la, tɔɔrɔ bɛ bɔ olu yɛrɛ de yɔrɔ. A lajɛ Bibulu tun ye kiraya kuma minnu fɔ ka tɛmɛn o ko la.

[Duguma sɛbɛn]

Marburg farigan ye bana ye min bɛ bɔ banakisɛ dɔ la, o min ni Ebola bɔlen don.

[Sɛbɛnni min bɛ ntiiri fila kɔnɔ]

“Misali la, ni wara ye mɔgɔ minɛ k’a tigi ɲɛnama dun, o ka jugu kosɛbɛ. O cogo kelen na, ni bana jugu dɔ y’i minɛ min bɛ ka i faga dɔɔnin-dɔɔnin walima n’i y’a ye ko o bana sugu ye i kɛrɛfɛ mɔgɔ dɔ minɛ, o fana ka jugu kosɛbɛ.”—MICHAEL OSTERHOLM, ALE KA BAARA BƐNNEN DON FIƝƐBANAW MA

[Foto tigiw]

© William Daniels/Panos Pictures