3. Zawtnak
3. Zawtnak
‘Mi pawl cu ṭih a nungmi zawtnak an ngei lai.’—LUKA 21:11, Contemporary English Version.
● Ram chung i raldohnak ruangah Africa ram pakhat ah zapi ngandamnak zohkhenhtu a simi Bonzali nih Marburg zawtnak ruangah a thi dengmi mine khor a comi hna kha a si khawh chungin a rak thlop hna. * Khuapi ah a ummi siilei mifim pawl kha bawmhnak a hal hna nain an rak bawm lo. Thlali a rauh hnuah amah bawmh dingin mi pakhat a rak phan. Asinain Bonzali cu a rak thi cang. An nunnak khamh dingin aa zuammi mine khor cotu hna nih Marburg zawtnak kha an rak chawnh caah a si.
Mah Nih Zeidah A Langhter? Mi nih an tonmi zawtnak lakah (cuap phin zawtnak ti bantuk), chungtlik zawtnak, HIV/AIDS zawtnak, TB zawtnak le raifanh zawtnak hna cu a poi bikmi an si. 2004 chung lawngah mah zawtnak phunnga ruangah minung nuai 10.7 hrawng an thi. Phundang in chim ahcun kumkhat chung dihlak ah second pathum ah mi pakhat cu mah zawtnak in an thi.
Mi Tam Deuh Nih Zeitindah An Lehrulh? Milu cu a karh chin caah zawtnak zong a tam chin. Cucaah zawtnak a ngeimi zong an tam chin.
Mi Tam Deuh Lehrulh Ning Cu Zumh Khawh A Si Maw? Vawleicung milu cu an karh chinchin cang. Asinain mi nih zawtnak a min kha an hngalh khawh, an kilven khawh i an thlop khawh. Cucaah zawtnak le mah ruangah a chuakmi harnak hna kha a tlawm deuh ding a si tiah ruah cu aa tlakmi a si. Asinain mah he aa ralkah in zawtnak cu a tam chinchin.
Nangtah Zeitindah Na Ruah? Baibal ah a chimchung bantukin mi cu ṭih a nungmi zawtnak hna an ngei maw?
Lihnin, mangṭam le zawtnak ruangah mi thong tampi cu harnak an tong. A dang mi thong tampi zong an minunghawi ruangah sifah harnak tampi an tong. Mi tam deuh cu anmah a kilvengtu ding a simi hna nih an hrem hna. Cutin a cang lai tiah Baibal nih a chimchungmi kha i cinken.
[A Tanglei Fianternak]
^ Marburg Hemorrhagic Fever timi Marburg zawtnak cu virus ruangah a si i Ebola zawtnak he aa pehtlaimi a si.
[Cahmai 6nak i a tawinak in langhternak]
“Chiandeih rawl si cu ṭih a nung tuk ko nain zawtnak ṭhalo nih a chuahtermi virus ngeih zong ṭih a nung tukmi a si. Kan pawngkam ah cu bantuk thil kan hmuhmi cu ṭih a nung tukmi a si.”—ZAWTNAKLEI SIIBAWI OSTERHOLM.
[Picture Credit Line on page 6]
© William Daniels/Panos Pictures