Profecía 3. Bren keta kabre

“Bren nika rabadi krübäte” (LUCAS 21:11).

● Juta keteiti África yete rü nämäne nakainkä krubäte. Juta yekänti Bonzali, sribikä sanidad pública käkwe ja di ngwani nitre sribikä minabätä nämäne krärä nekete virus Marburgo kisete ye kräkäi mike. Kukwe juani kwe nitre sribikä sanidad pública ie, akwa sö nikani kräbokä ta batibe nitre ye jatani niara dimike. Nitre ye nükani Bonzali dimike ngwane, Bonzali krütanina ñobätä ñan aune virus yekwe murie ketani arato.

¿KUKWE NAKÄNINANKA TÄ DRE MIKE GARE? Bren neumonía, grie, sida, tuberculosis aune paludismo, bren ye bäri tare krubäte tä ni ngwen ja tare nike. Kä 2004 yete bren ketarike ne käkwe nitre bäsi 11 millón murie ketani, ye abokän segundo krämä krämä te ni iti nämäne krüte nie raba.

KUKWE NIETA BIBLIA RÜERE. Nitre kä jökräbiti tibien tä nirien bäri, aisete nitre tä nemen bäri bren.

¿KUKWE NIETA YE METRE? Kä nengwane nitre nirien bäri kwati käbiti tibien, arato bren keta kabre ye kräke kräkä sribedre ño aune ni kriemikadre ño ye gare bäri kwin. Aisete bren ñaka rabadre krubäte, akwa ye erere ñan nemen bare.

¿KUKWE NE TUIN ÑO MÄI? ¿Nitre rabai ja tare nike krubäte bren kisete nieta Bibliakwe ye erere nemen bare?

Dobo kri, mrö nika aune bren keta kabre ye tä nitre millón kwati ngwen ja tare nike. Nitre kwati mada abokän tä ja tare nike nitre mada kisete, niaratre rabadre ja kriemike kwärikwäri näre, akwa ñaka nuainne. Profecía Bibliakwe tä dre mike gare kukwe yebätä ye ani mike gare jai.

[Kukwe mikata gare braibe]

“León o jondron mada nire krubäre käkwe ni murie ketadre ye tare krubäte. Ye erere arato, bren tare kisete nita krüte aune nitre mada kwati tä krüte ye tare krubäte”. (MICHAEL OSTERHOLM, EPIDEMIÓLOGO)

[Üai kite nirekri]

© William Daniels/Panos Pictures