3. Yaw’láts
3. Yaw’láts
«Ne’ets ka wa’tsin [...] yan i yaw’lats.» (LUCAS 21:11, Traducción en lenguaje actual)
● Al jun i bichow axi ti Africa wa’atsak jun i yaw’láts axi k’wajatak in odhnál yan i mineros. Axé’ xi yaw’láts pelak an Marburgo. A Bonzali k’wajiy ti tólmix abal ka iláliyatchik axé’ xi atikláb. * Jajá’ k’wajiy in ólchal an éyalchik abal kin t’aja’ jant’oj. Pero ma ti tse’ a its’ talbél tík’elej ti t’ajan ti kwéntaj. Ulits an tolmixtaláb, pero a Bonzali yabáts ejatak, dha’uyat k’al axé’ xi kidháb yaw’láts.
JAWA’ WAT’ENEK Wa’ats yan i kidháb yaw’láts, ejtíl an neumonía, an diarrea, an sida, an tuberculosis ani an paludismo, axi in lej odhnámal an atikláb. Axé’ xi bo’ i kidháb yaw’láts in t’aja’ abal ka tsemets utat once millones i atikláb ti 2004. Axé’ in tejwamedhál abal ti ox i segundo u tsémelak jun i atikláb.
JAWA’ TALCHIK IN ULAL. K’wajat ti lej yánel an atikláb, jaxtám jayej u yánel an yaw’láts.
¿CHUBAX NIXÉ’? Chubax abal yánenek an atikláb, pero jayej yánenek an ilálix ani an ilál. Jaxtám in tomnálak ka we’méj an yaw’láts, pero expidh k’wajat ti yánel.
¿JANT’OJ A TSÁLPAYAL? ¿Walám chubax wa’ats yan i kidháb yaw’láts antsaná’ jant’ini’ tin ulal an Biblia?
In lej yajchiknámal yan i atikláb tam u yatsnal an Tsabál, k’al an jayil ani k’al an yaw’láts. Pero jayej wa’ats yan i atikláb axi u odhnáb k’al in atk’wajil ani k’al i atiklábchik k’al axi in tomnálak ka beletnáj. Ka tsu’uw jant’oj in ulal an Biblia tin kwéntaj axé’.
[Nota]
^ párr. 3 An Marburgo pel ejtílits max i k’ak’él. Axé’ xi kidháb yaw’láts tal k’al k’e’at axi ejtílits an ébola.
[Comentario]
«Lej k’ak’adh ka tsalpay abal jun i ko’ nél ejtíl an tsoj ti k’apuw, pero jayej lej k’ak’adh ka t’aja’ ti kwéntaj abal jun i yaw’láts k’wajat ti odhnál ta al, ani tatá’ a tsu’tal.» (MICHAEL OSTERHOLM, EPIDEMIÓLOGO)
[An dhabal kʼal an foto]
© William Daniels/Panos Pictures