Profesiya 3. Taki
Profesiya 3. Taki
“I totolay noka ay . . . mapeggan tu kappaganassing nga taka-taki.”—LUCAS 21:11, Contemporary English Version.
● Si Bonzali ay tadday nga public health officer ta nasion na Africa nu sitaw egga i gerra sibil. Kingnguana i adde na mawayyana tapenu uruan i minero ira ta ilida nga magimmamatay ngana megafu ta Marburg virus. * Nakkiddaw yayya tu uffun ta ofisiales ira ta mas dakal nga siudad ngem ariadda yayya gininna. Nappasa i appa nga vulan, zimittal gabbalaman i uffun ngem natay ngana si Bonzali. Nesigi onu neyafung nisa i Marburg maggafu ta minero ira nga pinuruebanna nga uruan.
ANNI I IPASINGAN NA REPORT IRA? Kada dagun, napakaru i matay megafu ta taka-taki kagitta na pneumonia, diarrhea, HIV/AIDS, tuberculosis, anna malaria. Ta tanga-ragun laman, maggi 10.7 million i pinatay danatun nga lima nga taki. Nu innattam yatun, ta interu dagun, tadday nga tolay i matay ta kada tallu nga segundo megafu tatun ira nga taki.
ANNI I OPINION NA KARUAN? Umaru nga umaru i populasion na mundo, yayya nga siempre, mas umaru gapa i mafunan anna mattaki.
KURUG KARI YATUN? Talaga mas aru ngana i totolay ta mundo. Ngem mas nabbalin gapa tu malalaki i tolay nga maddetek, makkontrol, anna manguru tu taki. Yayya nga mas baddi nakuan i mattaki. Ngem ari tu yatun i mesissimmu.
ANNI I MAKAGIM? Talaga kari nga egga i kappaganassing nga taka-taki na totolay sangawe, gitta na neprofesiya ta Biblia?
Minillion nga totolay i grabe nga naperwisiu megafu ta lunig, bisin, anna taki. Ngem minillion paga i mazziga-riga megafu ta kasittoleda. Aru i biktima danuri na totolay nga mapprotekta nakuan nira. Innattam i niprofesiya na Biblia nga mesimmu.
[Footnote]
^ par. 3 I Marburg Hemorrhagic Fever ay efekto na tadday nga virus nga kagitta na Ebola.
[Blurb ta pahina 6]
“Kappaganassing i sigga-matolay nga tallangan na tadday nga leon onu tanakuan nga ayam. Ngem kunnatun gabbalaman i sisinu nga ipapatay megafu ta tadday nga kappaganassing nga taki anna masingammu nga mesissimmu gapa yatun ta tanakuan.”—MICHAEL OSTERHOLM, TADDAY NGA EPIDEMIOLOGIST.
[Picture Credit Line ta pahina 6]
© William Daniels/Panos Pictures