3. Ebʼ li yajel
3. Ebʼ li yajel
«Taawanjeʼq [...] yajel» (LUCAS 21:11, SBG).
● Laj Bonzali, jun laj bʼanonel saʼ África bʼarwiʼ yook li yalok u kixbʼaanu chixjunil li wank saʼ ruqʼ re xbʼanbʼalebʼ laj kʼanjel li yookebʼ chi kamk xbʼaan li yajel Marburgo. * Kixpatzʼ xtenqʼ re jalan chik ebʼ laj bʼanonel abʼan keʼbʼayk kaahibʼ po chi xtenqʼankil. Ak xkamk chik laj Bonzali naq kiwulak li tenqʼ. Kixchap li yajel rikʼin li yook raj xtenqʼankilebʼ.
KʼARU NAXKʼUT EBʼ LI ESIL? Li xyajel li pospoʼoy, li numeʼsaʼ, li kaqi yajel (SIDA) ut li raxkehobʼ ak xkamsi naabʼal li kristiʼaan. Saʼ li chihabʼ 2004, ebʼ li yajel aʼin kixkamsi 11 miyon li kristiʼaan, naraj xyeebʼal naq rajlal oxibʼ kʼajkʼasal (second) wank ani nakamk.
LI NEKEʼXYE. Yook chi tamk li xkʼihalil ebʼ li kristiʼaan, joʼkan naq naabʼalebʼ chik nekeʼyajerk.
MA YAAL LI NEKEʼXYE? Usta naabʼalebʼ chik li kristiʼaan saʼ li ruuchichʼochʼ, joʼkan ajwiʼ ebʼ li winq nekeʼroksi li xseebʼalebʼ re xtzʼilbʼal, rilbʼal ut xbʼanbʼal ebʼ li yajel. Abʼan inkʼaʼ yook chi kʼosk li yajel, yook bʼan chi numtaak.
KʼARU NAKAAKʼOXLA? Ma wank ebʼ li ninqi yajel joʼ kixye chaq li Santil Hu?
Chi miyon ebʼ li kristiʼaan nekeʼxkʼul rahilal xbʼaan li hiik, li weʼej ut ebʼ li yajel. Naabʼalebʼ ajwiʼ nekeʼrahobʼtesiik xbʼaan ebʼ li rechkristiʼaanil ut wankebʼ nekeʼrahobʼtesiik xbʼaan li teʼkoloq raj rehebʼ. Kʼe reetal li naxye ebʼ li xpropesiiy li Santil Hu chirix aʼin.
[Kʼe reetal]
^ párr. 3 Li yajel Marburgo aʼan jun li tiq li narisi laakikʼel li chanchan li yajel ébola.
[Naxye]
«Xuwajel xnawbʼal naq tatkʼuxeq xbʼaan jun li kaqkoj malaj jalan chik li josqʼ aj xul abʼan qʼaxal xuwajel wiʼ chik xnawbʼal naq wank jun laayajel li timil timil yook aakamsinkil». (MICHAEL OSTERHOLM, EPIDEMIÓLOGO)
[Li jalam u chalenaq]
© William Daniels/Panos Pictures