3. Ағырығлар
3. Ағырығлар
«Ағырығлардаң хырылыс полар» (ЛУКА 21:11).
● Африкада, гражданскай чаа полчатхан пір хазнада, имнег тоғызын апарчатхан Бонзали позының городында, марбург-вирустығ ағырығнаң * ағырып, ӱрепчеткен шахтерларны имнирге прай кӱзін салған. Улуғ арах городтағы пастыхтардаң полызығ сурынҷаң, че олар полыспааннар. Тӧрт ай пазынаң полызығ килгенде, уғаа орай полған: Бонзали, имнеп аларға кӱстенген шахтерлардаң ол ағырығны чухтырып алып, ӱреп парған.
ФАКТТАР НИМЕ КӦЗІТЧЕЛЕР? 2004 чылға ла ӧкпе ағырии (кӧзідімге пневмония), істі ағырии, СПИД, туберкулез паза малярия ӱчӱн он миллион чарым азыра кізі ӱреен. Пасха сӧстернең, пу ағырығларның ӱчӱн полған на ӱс секундаа пір кізі ӱреҷең.
ТОҒЫР ЧООХ. Чонның саны ӧсче, аннаңар ағырығлар даа кӧптең кӧп полып одырчалар.
АНЗЫ АНДАҒ БА? Чир ӱстӱнде чонның саны сынап тың хозыл парған. Че кізілер амғы туста ағырығларны хай-хай артых диагностировать полчалар, тарирға пирбинчелер паза имнепчелер. Андағ прогресс ӱчӱн ағырығлар асхынах полып одырарға кирек нимес пе? Че хайди кӧрчебіс, ағырығлар уламох тың тарапчалар.
ХАЙДИ САҒЫНЧАЗАР? Кізілер ағырығлардаң ирееленерінеңер Библияда пазылған ухаанҷылас толча ба?
Чир тітіреені, ӧзӧгіс паза ағырығлар — миллионнарны чуртас чох артысчатхан кӧрінминчеткен кӱстер. Че хай-хай кӧп кізіні чағыннары, арачылир орнына, иреелепчелер. Библияда ниме аннаңар пазыл парғанын кӧр кӧреелер.
[Сноска]
^ абз. 3 Марбург-вирус ідӧк церкопитековай геморрагическай лихорадка тіп адалча. Ол ағырығ Эбола лихорадкаға тӧӧй.
[Вставка]
«Сині ала парыс алай пасха аң чирге итчетсе, уғаа хорығыстығ, че сині паза синің ибіркі кізілерні істінең ағырығ чіпчетсе, ідӧк хорығыстығ» (МАЙКЛ ОСТЕРХОЛМ, ЭПИДЕМИОЛОГ).
[Хоостаңар искіріглер]
© William Daniels/Panos Pictures