3. Kokolistli
3. Kokolistli
Onkas “uejueyi kokolistli” (LUCAS 21:11).
● Bonzali, eliyaya se tepajtijketl tlen itstoya África kampa maseualmej tlauel moteuiyayaj, ya kichijki kampeka kinpajtis katli tekitiyayaj ipan se mina pampa kipixtoyaj nopa kokolistli tlen itoka virus de Marburgo. * Maske kiniljuik katli kinyakanayayaj tepajtianij ma yakaj kipaleuitij, kema ya panotoya naui metstli yajkej kipaleuitoj, uan Bonzali ya miktoya pampa kimajkej nopa tlakamej katli kinekiyaya kinpaleuis.
¿TLAKE KINEXTIA TLEN PANOTOK? Nopa neumonía, sida, tuberculosis, paludismo uan tlen kichiua ma mapitsakaj tlauel kintlaijiyouiltia maseualmej. Ipan 2004, ni kokolistli kinmiktik nechka once millones maseualmej, nopa kiijtosneki ipan tres segundos mijki se akajya.
TLEN SEKIJ KIIJTOUAJ. Nama maseualmej nojua tlauel momiakilijtiauij, yeka nojua tlauel miakej mokokouaj.
¿NELIA TLEN KIIJTOUAJ? Maske kena itstokej miakej maseualmej, nojkia itstokej miakej tepajtianij katli kimatij kenijkatsa kiitasej tlake kokolistli tijpiaj uan tlake pajtli techpaleuis, yeka maske monekiskia ayokmo onkas miak kokolistli, amo kiampa pano.
¿TLAKE TIMOILJUIA? ¿Timoiljuia nama onka miak kokolistli kej kiijtok Biblia?
Mayantli, kema mojmolinia tlali uan kokolistli kichiua miakej maseualmej tlauel ma tlaijiyouikaj. Uan nojua tlauel miakej kintlaijiyouiltiaj katli monekiskiaj kinpaleuisej. Xikita tlake kiijtok Biblia panoskia.
[Tlatsintla kiijtoua]
^ párr. 3 Nopa fiebre hemorrágica de Marburgo yoli ika se virus tlen eli kej nopa ébola.
[Tlajtoli tlen pankisa]
“Tlauel amo kuali tlaj se león o seyok tlapiali mitskuas, uan nojua tlauel amo kuali kema tikitas se kokolistli kitlamiltijtias motlakayo ika yolik uan amo tleno uelis tijchiuas” (MICHAEL OSTERHOLM, KATLI KIITA KENIJKATSA MOMOYAUA KOKOLISTLI).
[Katli iaxka tlaixkopinkayotl]
© William Daniels/Panos Pictures