3. Imikhuhlane
3. Imikhuhlane
“Kuzakuba . . . lemikhuhlane emibi.”—ULUKHA 21:11.
● Kwelinye ilizwe elise-Africa elihlala lihlaselwe yizimpi, kulendoda eyayisebenza esibhedlela okuthiwa nguBonzali. Yayisenza konke okusemandleni ayo ukuze yelaphe izisebenzi zemayini ezazilomkhuhlane we-Marburg. * UBonzali wacela ukuncediswa yiziphathamandla ezisedolobheni elikhulu. Isicelo sakhe saze saphendulwa ngemva kwenyanga ezine kodwa yena wayesefile, ebulawa ngumkhuhlane we-Marburg ayewuthelelwe yizisebenzi zemayini ayezama ukuzinceda.
UBUFAKAZI BUTSHENGISANI? Kulemikhuhlane eminengi ebulala abantu egoqela i-pneumonia, isihudo, i-HIV/AIDS, i-TB, imalariya leminye. Emnyakeni osanda kwedlula imikhuhlane le ibulele abantu abangaba ngu-10,7 miliyoni. Lokhu kutsho ukuthi ngemizuzwana emithathu nje kuphela bekusifa umuntu oyedwa.
OKUJAYELE UKUKHULUNYWA NGABANGAVUMELANI LESIPHROFETHO LESI. Okwenza kukhanye angani imikhuhlane isiminengi yikuthi sekulabantu abanengi kakhulu emhlabeni. Lokho kutsho ukuthi banengi abazabanjwa yimikhuhlane.
ABAKUTSHOYO KULIQINISO YINI? Liqiniso ukuthi abantu bayanda kakhulu emhlabeni. Kanti njalo sekube lentuthuko kwezokuhlola imikhuhlane, ukuyelapha lokunciphisa ukumemetheka kwayo. Ngenxa yolwazi olunengi kangaka oselukhona, asikhangelelanga ukuthi imikhuhlane iqhubeke imemetheka. Kodwa okumangalisayo yikuthi lokhe ithwalise abantu nzima.
UCABANGANI? Liqiniso yini ukuthi abantu bahlaselwa yimikhuhlane emibi njengoba iBhayibhili lalitshilo?
Ukuzamazama komhlaba, indlala kanye lemikhuhlane kuhlasela amamiliyoni abantu. Kodwa kuphinda kube labantu abaphatha kubi abanye. Ikanti abanengi bahlukuluzwa yilabo okumele babavikele. Zwana ukuthi isiphrofetho esiseBhayibhilini sasitheni.
[Amabala angaphansi]
^ indima 3 Umkhuhlane we-Marburg ubangelwa ligcikwane elihambelana lalelo elibangela umkhuhlane we-Ebola.
[Umfanekiso osekhasini 6]
Eyinye ingcitshi ithi ukukhukhuzwa ngumkhuhlane omubi kuyazifananela nje lokudliwa yisilwane ukhangele. Okubuhlungu yikuthi imikhuhlane enjalo ihlasela abantu abanengi kakhulu.—UMICHAEL OSTERHOLM INGCITSHI EBONA NGEMIKHUHLANE EMEMETHEKAYO.
[Picture Credit Line on page 6]
© William Daniels/Panos Pictures