3. Qeshyakuna
3. Qeshyakuna
“Pesti qeshyawanmi wanuyanqa.” (LUCAS 21:11.)
● Guërrawan hipashqa África nacionchö salud rikaq Bonzali shutiyoq nunam, tukïta rurarqan mïnakunachö trabajaq nunakunata Marburgo qeshyapita kachakätsinampaq. * Saludchö mandakoq autoridadkunatam willatsirqan, pero chusku killataran yanapaqnin hampinkunawan ëwayarqan. Y yanapaq chäriyänampaqqa Bonzaliqa wanushqanam karqan. Mïnachö trabajaqkunata hampinqanchömi kikimpis tsë wanutsikoq Marburgo nishqan qeshya tsaririptin wanurirqan.
¿IMATATAQ RIKÄTSIKUN PASAKUNQANKUNA? Neumonïanö shütëta mana puëdeyanqan qeshyakuna, diarrea, sida, tuberculosis y paludismo qeshyakunam alläpa atskaq nunakunata wanïkatsishqa. Kë pitsqan qeshyakunam 2004 watachö chunka huk millón nunakunata wanutsishqa, o huk parlëchöqa cada kima segundom huk nuna wanurqan tsë qeshyakunawan.
WAKINKUNA NIYANQAN. Nunakunaqa masmi mirëkäyan, tsëmi más nunakuna qeshyayan.
¿RASUMPAKU NIYANQAN? Nunakuna más mirayashqa kayaptimpis, qeshyakunata reqita, controlëta y hampitapis yachakuyashqam. Tsënö këkaptinqa, manatsuraq wallkanman? Pero rasun kaqchöqa masmi mirakïkan.
¿IMA NINKITAQ?¿Biblia ninqannöku kanan witsan nunakuna qeshyakunawan hipayan?
Patsa kuyïkuna, mallaqëkuna y qeshyakunam atska millón nunakunata hipëkätsin. Hina atska millón nunakunatam nuna mayinkunalla o familiankunalla yanapayänampa rantin hipatsiyan. Tsëpaq Biblia ninqanta rikärishun.
[Päginapa ura kuchunchö willakï]
^ par. 3 Marburgo qeshyawanqa yawarmi yarqun alläpa fiebre kaptin, imëka ébola qeshyawannö.
[6 kaq päginachö ninqan]
“Alläpa mantsakëpaqmi huk león o mikukoq animal mikushunëkiqa, hina tsënö mantsakëllapaqmi ruripa huk qeshya mikïkäshunqëkita musyëpis.” (MICHAEL OSTERHOLM, EPIDEMIÓLOGO)
[6 kaq päginachö pikunapa kanqan]
© William Daniels/Panos Pictures