3. Kobela
3. Kobela
‘Akobela ti sioni . . . ayeke sara azo na ando nde nde.’—LUC 21:11, Fini Mbuki, 2001.
● Bonzali ayeke sara kua na ndokua ti kaïngo kobela na yâ ti mbeni kodoro ti Afrika so mbeni ngangu bira atï na yâ ni. Lo sara ye kue so lo lingbi ti sara ti mû maboko na azo ti gbata ti lo so ayeke sara kua ti gingo amosoro ti gbe ti sese na so ayeke kui na kobela ti Marburg. * Lo hunda akota zo ti ndokua ti seni so ayeke na kota gbata ni ti mû maboko na lo, me lo wara ye oko pëpe. Nze osio na pekoni la ala ga ti mû maboko na lo, me Bonzali akui awe. Lo wara kobela ti Marburg ti azo ti gingo mosoro ti gbe ti sese so lo gi ti sö ala so.
AYE SO ASI AFA NYEN? Akobela ti yâ ti fufu, (na tapande kobela ti pneumonie), akobela ti sasa, SIDA, kota koro, nga na palu ayeke na popo ti akobela so afâ azo mingi. Na ngu 2004, akobela oku so afâ azo 10 700 000 tongaso. Tongana a diko ni na mbeni lege nde, na yâ ti ngu ni so kue tongana kete penze-ngbonga ota ahon akobela so afâ zo oko, kete penze-ngbonga ota ahon akobela so afâ mbeni ti gue na ni.
TËNË WA AZO AYEKE TENE KA MINGI? Wungo ti azo ti dunia angbâ ti gue na li ni, tongaso wungo ti azo so alingbi ti tï kobela ayeke gue nga na li ni.
TËNË SO ALA TENE AYEKE NA LEGE NI? Wungo ti azo ague na li ni mingi na yâ ti dunia. Me kode ti gingo ti hinga akobela, ti kangango lege na ni nga ti kaïngo na ni ague nga na li ni mingi. Tongaso, a yeke na lege ni ti tene kobela nga na akpale so aga na pekoni akiri na peko pëpe? Aye so asi ayeke tâ nde mingi.
MO TENE TI MO NYEN? Azo ayeke bâ pasi na akobela ti sioni tongana ti so Bible asara tënë ni kozo?
Ayengingo ti sese, kota nzara nga na asioni kobela afâ azo kutu mingi. Azo kutu mingi abâ nga pasi na maboko ti amba ti ala: mingi ti azo ni so abâ pasi tâ gi na maboko ti azo so alingbi fade ti bata ala. Bâ ye so Bible afa atene ayeke si.
[Kete tënë na gbe ni]
^ par. 3 Marburg ayeke makongo ti kobela so akpa ti Ebola.
[Kete tënë na lembeti 6]
“Ti tene bamara wala mbeni ye la ate mo ayeke sioni mingi. A yeke nga sioni mingi ti tene mbeni sioni kobela la ate mo na yâ ti tere ti mo nga mo bâ so a yeke ye so asi nga na azo so angoro mo.”—WANGANGA MICHAEL OSTERHOLM.
[Lingu ti foto na lembeti 6]
© William Daniels/Panos Pictures