Kwaghôron u Profeti 3. Angev
Kwaghôron u Profeti 3. Angev
“Ubombauangev vea lu sha ajiir wue wue.”—LUKA 21:11.
● Ken veghertar u Afrika la, orgen ngise yaren hen iyouci i gomoti hen geri ugen u yange i nôngo ityav ken tar u Congo Kinshasa, i vihi akaa her kpishi yô. Iti i ortwer ne ér Bonzali. Yange a shi nôngon sha afatyô na cii ér una sôr mbatomov mba dughun awen a injaa shin inya angev mbu i yer ér Marburg, * mbu yange mbu lu wuan ve la. Nahan a zamber a mbatwerev mba hen geri u vesen ugen ken tar la ér ve wase un, kpa i er kwagh sha mi ga. Iwer ngi karen inyiin yô, i tindi a iwasen, kpa hen shighe la nahan, Bonzali kpe kera. Yange tôô angev mbu Murburg la hen ior mba lu nôngon una sôr ve mbu la.
UBOMBAUANGEV MBA SHA AJIIR AGEN KPA? Iangev mbi ka mbi na or nan kera faantyô u ôôn tsembelee ga, er hough u sha ijô ahan, man akôngo a haan, man HIV/AIDS, man houghbar kua malaria nahan cii, ka iangev mbi igen ken ubombauangev mba ve lu hemban wuan uumace yô. Ken inyom i i sember been ne, iangev mbi itian mbin wua ior je kuma iorov miliôn pue man dubu deri utaankaruhar. Kwagh ne tese ér, ken inyom la cii, hanma sekônd yô, angev môm ken iangev mbin mbu wua or.
KA NYI IOR KPISHI KA VE ÔR U NYIMAN IKYAV I KWAGH NE? Ior mba ngeen sha tar seer a seer, ka nahan ve mba gban iangev kpa ve lu seer a seer ye. Er ior ve ngee sha tar hegen kpishi yô, iangev kpa mbia fatyô u tsaren ior kpishi.
KWAGH U KA VE ÔR NE KA MIMI JE KPA? Er ior ve seer ngeen sha tar kpishi nahan, igbenda i tôvon iangev, man igbenda i yangen kua igbenda i sôron mbi kpa i seer fan. Nahan hegen iangev ma mbi pande shi ma mbi de u wuan ior ga zee? Kpa iangev mbi seer a seer shi mbi hemban wuan ior cii.
U NENGE NENA? U nenge wer umbombauangev mba wuan ior, er Bibilo i tsenga ôron nahan kpa?
Kwagh u tar u lu tenger sha ajiir kposo kposo la, kua ijen man iangev cii ka mbamzeyol mba ve ne ior umiliôn imôngo ve lu yan ican kpishi yô. Shi ior umiliôn imôngo mbagenev mba yan ican sha ikyev i uumace mbagenev, man mbagenev kpishi ka ior mba ma ve lu kuran ve la je ve hide ve lu eren ve ican ye. Nenge ase kwagh ugen u Bibilo i tsenga ôron ér sôôn eren yô.
[Ngeren u shin kpe]
^ Ikyum. 3 Angev mbu fiva mbu i yer ér Marburg Hemorrhagic Fever la mbu wa zan er ka angev mbu Ebola nahan.
[Mkaanem ma]
“Er i lu kwagh u cieryol kpishi u begha shin ma kwagh ugen a ya u nahan, kape bouange kpa i lu kwagh u cieryol kpishi u nengen er a lu yan we shin a lu vihin iyol you je la.”—Mkaanem ma ORTWER UGEN, ITI NA ÉR MICHAEL OSTERHOLM.
[Ape i zough a foto]
© William Daniels/Ufoto mba Panos