3. Chamelik

«Jitsan oj yiʼe wokol yuj tsatsal chamelik» (LUCAS 21:11, Traducción en lenguaje actual).

● Ja Bonzali, jun olomal bʼa wa skʼela oj ajyuk asyado bʼa jun país bʼa África bʼa jel ixtalanubʼal yuja guerra. Ja yeʼn, skʼulan ja janekʼ bʼobʼyuj bʼa oj yajnay ja mineroʼik ja bʼa slugar bʼa wane chamel yuja virus Marburgo, jun tikʼe chamel wa xyaʼa kʼakʼ. Skʼanayi skoltajel ja sloktorik ja gobyerno, pe ekʼ mas ja chane ixawi tito koltaji. Yajni jul ja koltaneli, ja Bonzali chamta. Ekʼni sbʼaj ja virus jel malo yiʼoje ja mineroʼik.

JASA WA SJEʼA JA JAS EKʼELI. Ja chamelik bʼa yijel ikʼ (jastal ja neumonía), ja chamelik bʼa ekʼ lukum, ja sida, ja tuberculosis sok ja paludismo jani ja chamelik jel malo wa xyiʼaj wokol ja kristyano. Ja joʼe tikʼe chamel it smila 10.7 miyon kristyano ja bʼa 2004, ma bʼa pilan yaljel, cham june kada oxe segundo.

JA JAS WA XYALAWE. Bʼa sutanal ja luʼumi wani pojxel mas kristyano; ja yuj ayni sbʼej ke oj koʼuke mas chamel.

¿AY MAʼ STOJOL JA JAS WA XYALAWE? Ama jelxani pojxita ja kristyano ja bʼa luʼumi, pe cha jachuk ja snajel jas tikʼe chamelik, skʼulajel controlar sok yajnajel. Ja yuj, ¿mi maʼ sbʼejuk oj tsʼujuk ja chamelik? Jaʼukto maʼ, kechantani ipaxel.

¿JAS WAXA PENSARAN? ¿Wan maʼ yijel wokol ja kristyano yuj tsatsal chamelik jastal yalaxakan ja Biblia?

Ja terremotoʼik, ja waʼin sok ja chamelik wani xyixtalan miyonik kristyano. Jitsan kristyano wa xyiʼaje wokol yuj smul tuk kristyano, jitsan bʼa yeʼnle jani wa x-ajiyile wokol yuja matik tʼilan oj talnajuke.

[Xcholjel]

«Jelni xiwela sbʼaj ke jun choj ma tuk kʼakʼal chante oj skʼux-a, pe jachni jel xiwela sbʼaj ke jun jasunuk oj xchʼak ja bʼa wojol sok yiljel ja jas wan ekʼelabʼaj». (MICHAEL OSTERHOLM, EPIDEMIÓLOGO)

[Bʼa eleli ti wax tax]

© William Daniels/Panos Pictures