Vuprofeta Bya Vunharhu. Mavabyi
Vuprofeta Bya Vunharhu. Mavabyi
“Vanhu va ta va ni . . . mavabyi lama nga tshungulekiki.”—LUKA 21:11, Contemporary English Version.
● Bonzali, la nga nhloko ya timhaka ta rihanyo etikweni ra le Afrika leri hlaseriweke hi nyimpi ya xin’wana-manana, u endla leswi nga ematimbeni yakwe leswaku a tshungula vatirhi va le mayini lava nga edorobeni ra ka vona, lava dlayiwaka hi xitsongwatsongwana xa Marburg. * Swikombelo swakwe swo lava mpfuno eka vatirhela-mfumo va le dorobeni lerikulu a swi hlamuriwanga. Endzhaku ka tin’hweti ta mune, swikombelo swakwe swi hetelele swi hlamuriwile kambe Bonzali se a file. U tluleriwe hi xitsongwatsongwana xa Marburg lexi a xi kumeke eka vatirhi va le mayini lava a a ringeta ku va pfuna.
I YINI LESWI MATIMU MA SWI VULAKA? Vuvabyi bya mahahu (byo tanihi nyumoniya), vuvabyi bya nchuluko, HIV/AIDS, rifuva ni dari i man’wana ya mavabyi lama hlaselaka vanhu. Nkambisiso lowu wa ha ku endliwaka wu ringanyeta leswaku mavabyi lawa ya ntlhanu ma dlaye vanhu va 10,7 wa timiliyoni. Leswi vulaka leswaku mavabyi lawa a ma dlaya munhu un’we eka tisekoni tin’wana ni tin’wana tinharhu lembe hinkwaro.
I YINI LESWI VANHU VA SWI VULAKA? Vanhu emisaveni hinkwayo va ya va andza kutani ku ni swiviko swo tala swa mavabyi. Ka ha ri ni vanhu vo tala lava nga ta tluleriwa hi mavabyi.
XANA LESWI VA SWI VULAKA I NTIYISO? Nhlayo ya vanhu yi engeteleke hi ndlela leyi hlamarisaka laha misaveni. Swi tano ni hi mavabyi lawa va kumiwaka va ri na wona, lawa va kotaka ku ma lawula ni ku ma tshungula. Kutani leswi a swi fanele swi endla leswaku mavabyi ma hunguteka. Kambe mo ya ma nyanya.
U EHLEKETA YINI? Xana vanhu va karhatiwa hi vuvabyi lebyi nga tshungulekiki hilaha Bibele yi profeteke hakona?
Ku tsekatseka ka misava, ndlala ni mavabyi i swin’wana swa leswi endlaka leswaku timiliyoni ta vanhu ti dya mbitsi ti xeva hi nhlomulo. Vanhu va timiliyoni va xanisiwa hi vanhu-kuloni—vo tala va xanisiwa hi lava a va fanele va va sirhelela. Xiya leswi vuprofeta bya Bibele byi vuleke leswaku a swi ta humelela.
[Nhlamuselo ya le hansi]
^ par. 3 Marburg Hemorrhagic Fever i xitsongwatsongwana lexi fanaka ni xa Ebola.
[Marito lama tshahiweke exihlokweni lama nga eka tluka 6]
“Ku dyiwa hi nghala kumbe hi nchumu wun’wana swa vava kambe a hi nchumu loko swi pimanisiwa ni ku hlaseriwa hi vuvabyi lebyi nga tshungulekiki.”—MICHAEL OSTERHOLM, MUTIVI WA TA MAVABYI NI KU HANGALAKA KA WONA.
[Laha Xifaniso Xi Humaka Kona eka tluka 6]
© William Daniels/Panos Pictures
