Obunabbi 3. Endwaire
Obunabbi 3. Endwaire
“Abantu . . . balibonabona habw’endwaire ez’akabi.”—LUKA 21:11, Contemporary English Version.
● Bonzali, anyakuli omukuru w’eby’obwomeezi omu ihanga limu erya Afirika nambere habaire obulemu, akora kyona eky’arukusobora kujanjaba abakozi abarukuhaiga eby’obuguuda omu itaka omu tawuni y’owabu abarukufa habw’akahuka ka Marburg. * Asaba obukonyezi hali abakuru ab’omu rubuga orw’amaani baitu tagarukwamu. Hanyuma y’emyezi ena, obukonyezi bwija baitu Bonzali amazire kufa. Akakwatwa akahuka ka Marburg obw’akaba n’alengaho kujanjaba abakozi abarukuhaiga eby’obuguuda eby’omu itaka.
AMANANU NIGOOLEKA KI? Oburwaire oburukutalibaniza kwikya (nk’ekihaso), endwaire ezireeta kuturuka, akahuka akaleeta omunywererro rundi siliimu, enkorro ey’akakonko, hamu n’omuswija gw’emibu ziri zimu ha ndwaire ezirukwita abantu. Omu myaka nke enyuma, ebika by’endwaire binu bitaano bikaita abantu abarukuhika 10,700,000. Kinu nikimanyisa ngu endwaire zinu zaitaga omuntu omu buli hanyuma y’obutikitiki busatu, kumara omwaka gwona.
ABANTU BAGAMBA KI? Abantu nibaikara nibeyongera omu nsi, kandi nikyo kirukuleetera endwaire kweyongera kukanya. Haroho abantu baingi abasobora kukwatwa endwaire.
MALI ENTEKEREZA EGI EHIKIRE? Abantu beyongiire kukanya omu nsi. Baitu n’obusobozi obw’okukebera, kutangira, n’okujanjaba endwaire zinu bweyongiire. Nahabweki, endwaire zisemeriire kuba nizeyongera kukeeha omu bantu. Baitu niturora nizeyongerabweyongera.
NOTEKEREZA KI? Abantu nibarwara endwaire ez’akabi nk’oku Baibuli yarangire?
Emisisa, enjara, hamu n’endwaire biri bintu eby’amaani ebyeyongiire kubonabonesa n’okwita obukaikuru bw’abantu. Obukaikuru bw’abantu abandi nibabonabonesebwa abantu bataahi baabo, kandi abarukukira obwingi nibabonabonesebwa abo abasemeriire kubalinda. Wetegereze Baibuli eky’egamba ngu kyakubaireho.
[Obugambo obuli hansi]
^ kac. 3 Oburwaire oburukumanywa nka Marburg Hemorrhagic Fever nibuleetwa akahuka akarukusisana na Ebola.
[Ebigambo ebikomerwemu]
“Kibi kulemwa kuliibwa entale rundi ekintu ekindi baitu kandi kibi muno kuliibwa akahuka akataito omunda n’aheeru.”—EPIDEMIOLOGIST MICHAEL OSTERHOLM.
[Ekisisani Nambere Kiihirwe]
© William Daniels/Panos Pictures