Eprofesia 3. Iretta

“Atthu anrowa . . . owereiwaka iretta sinceene”.​—LUKA 21:11, Contemporary English Version.

● Bonzali, aari nfirimeero a elapo emosa ya wÁfrica yahaareere owaniwa ekhotto, aahimananiha vanceene waaloola atthu yaathipa maluku a epooma awe yaawo yaakhwa mwaha wa efeepere eniihaniwa Marburg. * Owo aahivekela okhaliheriwa ni mafirimeero a epooma ekina, masi makhulupale a epooma ele yaahikhootta. Nuumala ovira myeeri 4, yaahiphiya manfirimeero wira akhaliherye, masi Bonzali aahikhwa. Owo aahirava efeepere Marburg ya atthu yaathipa maluku aaloola awe.

ITTHU SINCEENE SINOONIHERYA EXEENI? Iretta ntoko iphumu, ovaluwa, HIV/SIDA, elapaha ni malária siniirela mpantta iretta sinceene siniwiiva apinaatamu. Vanihimmwa wira iyaakha iya sookiserya olumwenku wotheene iretta iyo soowiiva atthu imilyau 10.7. Eyo enooniherya wira mwaakha wotheene, khula isekuntu 3 iretta iyo sanimwiiva mutthu mmosa olumwenku wotheene.

ATTHU AKINA ANIHIMYA EXEENI? Okhala wira atthu anootepa wuncerereya olumwenku wotheene, nave iretta sinnincerereya. Nave atthu anceene annirava iretta.

NIIREKE ITTHU IYO ANIHIMYA AYA TI SEKEEKHAI? Ekeekhai wira atthu annincerereya. Masi, apinaatamu ahincererya osuwela waya woona, okasoopa ni oloola iretta iyo. Nto niireke iretta sinaahaaxa apinaatamu khisaarowa ovukuwa? Masi ohiya ovukuwa, sinimuncerereya.

NYUWO MUNOONELA SAI? Niireke apinaatamu sinnaaphwanya iretta sinceene ntoko Biibiliya aahimmye awe vahinatthi?

Itetere, etala ni iretta sinniwiiva atthu imilyau sinceene. Atthu akina annihasuliwa ni apinaatamu akina, nave atthu akina annihaaxiwa ni atthu yaale yaarowa waakhapelelaka. Nwehe ele Biibiliya aahimmye awe wira yaamwiiraneya.

[Enoota]

[Eponto yuulupale epaaxina 6]

“Ti vootakhala okhuuriwa ni kharamu wala etthu ekina, masi vannitepa owereya okhwa mwaha wa iretta sinikhumelela olumwenku wotheene”.—EPIDEMIOLOGISTA MICHAEL OSTERHOLM

[Masu a Elatarato ya Epaaxina 6]

© William Daniels/Ifootu ni Ilatarato