3. Yilwele
3. Yilwele
“Ŵandu . . . chachilagaga ni yilwele yakogoya.”—LUKA 21:11, Contemporary English Version.
● Mundu jwine lina lyakwe Bonzali, ŵakamulaga masengo pachipatala chine ku Africa pandaŵi jakwatendekwaga ngondo ja pachiweniweni. Jwalakwe ŵakamuchisyaga ŵandu ŵaŵasimanikwe ni ulwele wa Marburg a mutawuni jakumangwakweko. Ŵandu ŵaŵalwalaga ulwelewu ŵakamulaga masengo mu mgodi winewakwe. Bonzali jwaŵendile chikamuchisyo chamtela kwa achakulungwa ŵa yipatala yine nambo nganampa chikamuchisyocho. Kaneko pali pamasile myesi mcheche chikamuchisyo chamtela chila chayiche nambo pandaŵiji jwalakwe ŵaliji ali awile. Bonzali jwawile ni ulwele wa Marburg uŵawujigele pandaŵi jiŵakamuchisyaga ŵandu ŵaŵakamulaga masengo mu mgodi ŵala.
ANA MAUMBONI GAKUSALA YAMTULI? Yilwele mpela chibayo, kuwugula m’matumbo, HIV/AIDS, TB, soni malungo yili yine mwa yilwele yekulungwakulungwa yakuwa nayo ŵandu ŵajinji. Yaka yapachangakaŵapa, yilwele yeleyi yiwuleje ŵandu 10.7 miliyoni. Kusala kwine mpaka tujile kuti mu yaka yeleyi pa masekandi gatatu galigose yilweleyi yiwulejeje mundu jumo.
ANA ŴAKUSISYA AKUSASALA YAMTULI? Chiŵalanjilo cha ŵandu pachilambopa chikukwelape yayikutendekasya kuti yilwele yakupelegana yitupeje. Yeleyi yikutendekasya kuti ŵandu ŵajinji alwaleje.
ANA YAKUSALA ŴAKUSISYAŴA YISYENE? Pachilambopa chiŵalanjilo cha ŵandu chikukwela nditu. Nambosoni ŵandu apatile matala gakwakamuchisya kumanyilila, kuŵambala soni kumalana ni yilwele yejinji. Ana matala gelega nganigaŵa gakamuchisya pakunandiya kutupa kwa yilwele soni kuwanda kwakwe? Nambope, yeleyi ngayikukomboleka.
WAWOJO AKUGANISYA WULI? Ana ŵandu akulaga ni yilwele yakogoya mpela mujasasile Baibulo?
Yisichinya, sala soni yilwele yili yindu yakusawusya mnope yakulaga nayo ŵandu ŵajinji. Ŵandu mamiliyoni gejinji akutendeledwa ngasa ni ŵandu ŵakusasosekwa kuti ŵachenjeleje jemanjajo. Alole yajasasile Baibulo kuti yichitendekwa.
[Maloŵe ga Mwiŵanda]
a Kachilombo ka Marburg Hemorrhagic Fever kali kakulandana ni kachilombo kakakusatandikasya ulwele wa Ebola.
[Maloŵe Gagombelechesya pa peji 6]
“Yili yakogoya mnope kukulya lisimba kapena chindu chine chakogoya. Mwakulandana ni yeleyi yili yakogoyasoni kulidwa ni kachilombo kakakusatandikasya ulwele soni nikuwuwonaga ulwelewo uli mkwambuchila chilu chosope.”—MICHAEL OSTERHOLM JWAKUSAWUNGUNYA YAYIKUSATANDIKASYA ULWELE.
[Picture Credit Line on page 6]
© William Daniels/Panos Pictures