4. Nhiëër ye Kɔc Röt Nhiaar Acï Liu

Acïï wɛ̈t ë Nhialic lueel, ‘kɔc aa cïï kɔcken bï ya nhiaar.’—2 TIMOTHEO 3:1-3.

● Kris ee lui ke ye raan töŋ akut ë kɔc cï röt thiaak wɛ̈ɛ̈t bïk cïï ye thɔ̈ɔ̈r paanden, akut kënë, ee rɛ̈ɛ̈r paan ë United Kingdom [Europe]. Acïï Kris lueel, “anɔŋ tiiŋ töŋ ë ŋiɛc ke cïï muɔnyde nɔ̈k apɛi, na wën aloku yök ɣok yen, guɔ baai. Diäär kɔ̈k aa ye röörken ke kuɔ̈c nɔ̈k apɛi, ku na yɔ̈kkë we keek, ka cïï kë kɔŋ gam bïk yï lieec nyin.”

YEŊÖ YE KÄ CÏ RÖT LOOI KÄ NYUƆƆTH? Ë paan töŋ Apirika yic, të cït tik thiërdiäk ku diäk ë buɔɔtic [33%], aa ye röör ke rum bïk tɛ̈c ke keek ke ŋoot ke ye mïth, ku të cït tik thiërrou ku dhïc ë buɔɔtic [25%], aa ye röör ke nɔ̈k ke kök. Anɔŋ yäp ë cï looi paan Apirika töŋ kënë yic bïï röör thiëëc thook, go të cït moc thiërdhetem ë buɔɔtic yök ke yekë gam bï diäär dhiɛl ya nɔ̈k. Ku yen, aa cie diäär kapɛ̈c kek yeke yɔŋ, ayïï röör aya aa yeke yɔŋ. Cït man, të cït moc thiërdiäk ë buɔɔtic [30%] aa ye diäärken ke yɔŋ paan ë Canada.

YEŊÖ YE KƆC JUËC LUEEL? Kɔc cï röt thiaak aa röt kuɔ̈c ciëëŋ ku yɔŋ kë röt ë bɛ̈ɛ̈ikeniic. Ku yaaŋ kënë, acï ye nyin jä juak apɛi yeköölë ka wär dhaman thɛɛr.

NADƐ̈ KË YE KƆC LUEEL YE YIC? Wëët ye kɔc cï röt thiaak wɛ̈ɛ̈t bïk cïï ye thɔ̈ɔ̈r ku yekë ŋiɛc ceŋ ë bɛ̈ɛ̈ikeniic, acï ye nyin juak arëët. Nadɛ̈ cï wëët kënë kɔc cï röt thiaak kuɔny bïk kärɛc cïï ye luɔ̈i röt paanden? Akëc keek kuɔny ë wɛ̈t cïn kek nhiëërdït ë kamken.

YEŊÖ YE TAKIC? Nadɛ̈ cï wël cï ke lueel ë 2 Timotheo 3:1-3 röt tiɛŋ tëden? Nadɛ̈ cï nhiëër ë kɔcke baai nyin dhuk piny ë kamken?

Kën ë dhïc cïï Baibol lueel ye tïŋ ke tiiŋ rot tëde yeköölë, ajam ë biäk ë pinynɔm aya. Tïŋ kë cïï Baibol lueel ë wɛ̈t ee kënë.

 [Blurb on page 7]

Acïï Bɛ̈ny töŋ ë jam ë biäk ë yaaŋ ye kɔc baai röt yɔŋ lueel, “thɔ̈ɔ̈r ye kɔc cï röt thiaak thɔ̈ɔ̈r, acï tïŋ ke ye këtöŋ wën rot dac looi ë bɛ̈ɛ̈i juëc yiic. Ku kënë ee ye nyuɔɔth, raan alëu bï tiiŋde yɔŋ ayic thiërdiäk ku dhïc ku bï tiiŋde jä la ŋany awu le guel ë bolith nɔm.”—BƐ̈NY Ë JAM Ë BIÄK Ë YAAŊ Ë KƆC RÖT YƆŊ BAAI