TCUH KAˍ PAˍ TAWˇ HKAWˇ 4. YEHˬ KʼA HKʼAW HAꞈ DAꞈ VE MAˇ CAWˬ

‘Chaw teˇ hpaˍ lehˬ shu htaꞈ maˇ haꞈ puiˉ ve chaw hpehꞈ tuˬ yoˬ.’—2 TIˆMOˉSEˍ 3:1-3.

● Nu˗venˍ mvuhˇ miˬ lo yehˬ k’a hkʼaw hehnˇ ve awˬ ceuˬ te piˇ ve htaꞈ ga piˇ ve awˬ moˍ hkʼaw Hkiˆ kanˉ te chehˇ ve yoˬ. Yawˇ kʼoˆ ve, “yaˇ miˇ teˇ gʼaˇ awˬ hpawˇ dawˆ piˇ jaˇ leh naˬ jaˇ ve pa taw ngaˬ yawˇ htaꞈ mawˬ jaw ve naˍ kaꞈ tawnˇ maˇ gʼa. Yaˇ miˇ laiˉ g’aˇ kaꞈ awˬ hpawˇ dawˆ piˇ jaˇ leh nyi ma luˬ jaˇ ve yoˬ. Yawˇ hui awˬ nu ve chaw htaꞈ kaꞈ maˇ mawˬ daꞈ gaˇ.”

AWˬ TEHˬ VE Aˬ HTOꞈ MA LE? Aˉfaˍriˆkaˆ miˬ guiˬ mvuhˇ miˬ teˇ mvuhˇ miˬ lo yaˇ miˇ ehˉ 3 gʼaˇ ve hkʼaw teˇ gʼaˇ yaˇ ehˉ htaˇ kaꞈ shu naˬ mvuhˇ naˬ taweh te piˇ jaw ve yoˬ. Mvuhˇ miˬ oˇ ve hkʼaw chaˬ nyi mawˬ ve teˇ pawˆ hkʼaw kʼoˆ ve, hawˉ hkʼaˆ 3 g’aˇ hkʼaw ve teˇ gʼaˇ lehˬ, awˬ miˇ ma htaꞈ dawˆ ve a hkʼe leˇ ceh hpehꞈ ve tehꞈ dawˇ ve yoˬ. Yehˬ k’a hk’aw hehnˇ ve te piˇ ve lehˬ yaˇ miˇ ceh tiˉ maˇ heˆ, hawˉ hk’aˆ kaꞈ g’a hpuˇ ve yoˬ. Tawˇ pa haˉ te kʼo, Kaˬneˬdaˬ mvuhˇ miˬ hkʼaw hawˉ hkʼaˆ 10 gʼaˇ ve hkʼaw 3 gʼaˇ htaꞈ awˬ miˇ ma dawˆ piˇ ve yoˬ.

MAˇ˗AWˍ VE CHAW HKʼAˬ HKʼE KʼOˆ VE LE? Yehˬ kʼa hkʼaw hehnˇ ve awˬ ceuˬ te daꞈ ve cawˬ maw jaˇ˗oˬ. Yaꞈ hk’aˇ, chi teˇ hkui lehˬ oˇ htaˇ aꞈ kehˉ awˬ lawn chi hkʼe ve htaꞈ a yeˇ te ve yoˬ.

CHI HKʼE KʼOˆ VE AWˬ HKʼAˇ CA-AW LAˇ? Ponˬ laˬ ve hk’aˬ nyiˇ chi hkʼawꞈ maˇ gaˬ sheˍ htaˇ, chaw yaˇ yehˬ kʼa hkʼaw hehnˇ ve awˬ ceuˬ te daꞈ ve htaꞈ a yeˇ k’awꞈ yuˬ maˇ la ve yoˬ. Yaꞈ hk’aˇ, yehˬ kʼa hkʼaw hehnˇ ve awˬ ceuˬ te daꞈ ve htaꞈ a yeˇ yuˬ maˇ la htaˇ, yehˬ kʼa hkʼaw hehnˇ ve awˬ ceuˬ te daꞈ ve maˇ cawˬ maˇ˗o ve laˇ? Maˇ heˆ. Chi beuꞈ teˇ co˗e ve chaw oˇ htaˇ aꞈ kehˉ shu htaꞈ maˇ haꞈ puiˉ ve yoˬ.

NAWˬ HKʼAˬ HKʼE DAWˇ VE LE? 2 Tiˆmoˉseˍ liꞈ 3:1-3 hkʼaw tcuh kaˍ paˍ ve tawˇ hkawˇ awˬ tehˬ hpehꞈ la chehˇ-aw laˇ? Miˬ guiˬ hkʼoˆ lo ve chaw yaˇ maˇ maˇ yehˬ kʼa hkʼaw ve chaw htaꞈ maˇ haꞈ puiˉ ve maˇ heˆ laˇ?

Tcuh kaˍ paˍ ve tawˇ hkawˇ 5 hkawˇ teˇ hkawˇ ngaˬ hui ve chehˇ kuiˬ miˬ guiˬ chi htaꞈ caˉ daꞈ ve yoˬ. Tcuh kaˍ paˍ ve tawˇ hkawˇ awˬ lawn chi htaꞈ hkʼaˬ hkʼe kʼoˆ ve teˇ geh nyi sheˍ.

[Awˇ ceˍ awˇ fa]

“Yehˬ kʼa hkʼaw hehnˇ ve awˬ ceuˬ te daꞈ ve taˍnuꞈ (paˍriˆ) geh ca kʼoˆ piˇ˗e ve hkʼe taw maˇ cawˬ˗oˬ tehꞈ laiˉ gʼaˇ kʼoˆ ve yoˬ. Yaˇ miˇ lehˬ awˬ hpawˇ 35 pawˆ dawˆ piˇ peuˬ hkʼawꞈ nawˉ htaˇ taˍnuꞈ geh ca kʼoˆ piˇ ve yoˬ.”—VENˍ MVUHˇ MIˬ LO YEHˬ KʼA HKʼAW HEHNˇ VE AWˬ CEUˬ TE DAꞈ VE HTAꞈ GA PIˇ VE AWˬ MOˍ VE AWˬ TAN YAˇ MIˇ TEˇ G’Aˇ.