Kikite 4. ‘Ikai ha ‘Ofa Fakanatula

“Ko e kakaí ‘e . . . ‘ikai ha‘anau ‘ofa fakanatula ki honau ngaahi fāmilí.”—2 TIMOTE 3:1-3, God’s Word Bible

● Ko Chris ‘oku ngāue ia ma‘á e tokoni ki he fakamālohi ‘i he fāmilí ‘i Uēlesi Tokelau. “‘Oku ou manatu‘i ‘a e ha‘u ‘a ha fefine ‘e taha ‘a ia na‘e tā lahi faka‘ulia, ‘o ‘ikai lava ai ke u ‘ilo‘i ia mei he taimi fakamuimui na‘á ku sio ai kiate iá,” ko e lau ia ‘a Chris. “Ko e kakai fefine kehé ‘oku uesia lahi fakaeongo kinautolu ‘o a‘u ‘o ‘ikai lava ke toe mavahe honau matá mei he falikí.”

KO E HĀ ‘OKU FAKAHAA‘I ‘I HE NGAAHI MO‘ONI‘I ME‘Á? ‘I ha fonua ‘Afilika ‘e taha, ‘oku fakafuofua ko e fefine ‘e toko 1 ‘i he kakai fefine ‘e toko 3 kotoa pē kuo pā‘usi‘i fakaefehokotaki fakasino ia ‘i he‘ene kei si‘í. Ko ha savea na‘e fai ‘i he fonua tatau na‘e ‘ilo‘i ai ko e kakai tangata laka hake he vahe tolu ‘e taha na‘a nau ongo‘i ‘oku ala tali pē ke tā honau uaifí. Kae kehe, ko e kakai fefiné ‘oku ‘ikai ko kinautolu pē ‘oku ma‘ukovia he fakamālohi ‘i he fāmilí. Ko e fakatātaá, ‘i Kānata, ko e meimei toko 3 ‘i he kakai tangata ‘e toko 10 kuo tā kinautolu pe ‘i he tafa‘aki ‘e tahá, ‘oku ngaohikovi‘i kinautolu ‘e honau ngaahi hoá.

KO E HĀ HA FAKAFEPAKI ANGA-MAHENI? Kuo ‘i ai ma‘u pē ‘a e fakamālohi ‘i he fāmilí. Ko e me‘á pē he ‘oku fai ‘a e tokanga lahi ange ki ai he ‘ahó ni ‘i he ngaahi taimi he kuohilí.

‘OKU ‘UHINGA LELEI ‘A E FAKAFEPAKI KO IÁ? Ko e lāu‘ilo ki he fakamālohi ‘i he fāmilí kuo fakalalahi ia ‘i he ngaahi hongofulu‘i ta‘u ki mui ní. Ka kuo fakasi‘isi‘i ‘e he lāu‘ilo lahi ange ki he palopalemá ‘a e lahi ‘o e hoko ‘a e fakamālohi ‘i he fāmilí? ‘Ikai, ‘oku ‘ikai ko e tu‘ungá ia. Ko e ‘ikai ha ‘ofa fakanatulá ‘oku toe mafolalahia ange ai pē ia.

KO E HĀ HO‘O FAKAKAUKAÚ? ‘Oku fakahoko ‘a e 2 Timote 3:1-3? ‘Oku ‘ikai ‘ofa ‘a e tokolahi ki honau fāmilí ‘a ia ‘oku totonu ke hoko fakanatulá?

Ko e kikite hono nima ‘okú ke sio ‘i hono fakahokó ‘oku kau ki ai hotau ‘api, ko e māmaní. Fakakaukau angé ki he me‘a ‘oku fakahaa‘i ‘e he Tohi Tapú ‘i he kaveinga ko ení.

[Fakamatala ‘i he peesi 7]

“Ko e fakamālohi he fāmilí ‘oku fakahaa‘i ko e taha ia ‘o e ngaahi faihia hokohoko lahi taha ‘oku ‘ikai līpooti ‘i he sōsaietí. ‘I hono faka‘avalisí ‘e ngaohikovi‘i tu‘o 35 ha fefine ki mu‘a ke fetu‘utaki ki he kau polisí.”—KO HA FEFINE-LEA TOKONI HE TELEFONÍ MA‘Á E NGAOHIKOVIA ‘I HE FĀMILÍ ‘I UĒLESI.