Profecia 5. Destrozo del Tierra

“[El Dios hay] destroza ya con el maga destrozador del mundo.”​—REVELACION 11:18.

● Si Mr. Pirri amo un sanggutero de palma na Kpor, Nigeria. Afectao el de suyu lavida por causa na bien grabe oil spill na Niger Delta. “Ya mata este con el diamon maga pescao, ya hace malo con el diamon pellejo y ya destroza con el maga rio,” ele ya habla. “Nuay mas ya yo lavida.”

COSA TA DALE MIRA EL MAGA REPORT? Asegun na cuanto experto, 6.5 millon tonelada de basura el ta guinda na mar cada año. Maga 50 por ciento del basura amo plastic que ta necesita largo tiempo antes este man buluk. Puera que ta hace buling con el tierra, el maga gente bien paspas ta hace acaba con el maga cosas del tierra. Base na maga estudiada, el tierra ta necesita un año y cinco meses para debolbe el cosa ya usa el maga gente na un año. “Si el populacion y el consumo hay continua subi, hay necesita kita valor de dos Tierra para produci con el cosa kita necesita na año 2035,” ya habla el Sydney Morning Herald, un diario na Australia.

COSA TA HABLA EL CUANTO? Bright el maga gente y ta puede busca solucion na maga problema. Puede kita este solva y salva con el tierra.

DEVERASAN BA SE? Manada gente el ta hace esfuerzo para hace descanza con el polucion. Pero hasta ahora, un grande problema siempre este.

PARA CONTIGO? Necesita ba actua el Dios para salva con el diaton planeta desde na destrozo​—como cosa le ya promete hace?

Puera con el cinco profecia que ya considera kita, ya predicta tambien el Biblia maga positivo cosa que hay sucede na ultimo maga dia. Uno de ese amo el na ika-seis profecia.

[Blurb]

“Dol paraiso el onde yo ta queda del una. Pero ahora, dol tambak ya este de basura.”​—ERIN TAMBER, UN RESIDENTE NA GULF COAST, UNITED STATES, ACERCA NA EFECTO DEL OIL SPILL NA GULF OF MEXICO DEL 2010.

[Cajon]

Responsable Ba el Dios?

Ciendo el Biblia ya predicta con el maga mal suceso que ta puede kita mira ahora, quierre decir ba de este que el Dios amo el responsable con ese? Ele ba el causa del diaton sufrimiento? Puede tu incuntra el maga contestacion na ese maga pregunta na capitulo 11 del libro Cosa Kanaton Puede Enseña el Biblia? que yan publish el maga Testigo de Jehova.

[Picture Credit Line]

U.S. Coast Guard photo