Oesini 5. Angawaloon Fönüfan

“[Kot epwe] afeiengaua chokewe mi afeiengaua fanüfan.”​—PWÄRÄTÄ 11:18.

● Mr. Pirri, seni Kpor lon Nigeria, a kan okkusu chönün ewe irään palm pwe epwe föri wain seni. A ngawolo an na angang ren ewe watteen oil a nnich me naanfeil lon ena leeni. A erä: “Ra mälo ekkewe iik, a angawa pupu me ünüchen inisim. Ese chüen wor met upwe atufichi manauei seni.”

MET EKKEEI PWORUS RA PWÄRATÄ? Ekkoch sou tipatchem ra apasa pwe 13 million paun käpich ra tolong lon ewe mataw iteiten ier. Orun esopwun ena käpich, iir plastic repwe pappas fitepükü ier mwen repwe talo. Me lükün än aramas elimengawa fönüfan, ra pwal mwittir äeälo minne masouen fönüfan. Ekkewe sou käeö ra erä pwe a lamot eü ier me nimu maram fän iten ei fönüfan epwe aworasefäli minne aramas ra fen äeä lon eü ier. Iei alon eü simpung lon Australia, “Ika a sopwosopwolo chommongun aramas me mwittirin ar äeälo masouan fönüfan, iwe epwe lamot ngenikich ruu fönüfan lon en ier 2035.”

ALON EKKEWE RESE LÜKÜ. Aramas ra tipatchem me ra tufichin küna alen ar repwe pwäkini ei osukosuk me amürinnölo fönüfan.

MEI PWÜNG ALOR? Chommong ra angang weires le esilefetälei lamoten än aramas repwe älisatä tümünün fönüfan. Iwe nge, mi chök sopwosopwolo watte elimengawoloon fönüfan.

MET MEEFIOM? Mi lamot Kot epwe angolong me aükatiw minne a angawalo ei fönüfan, usun chök met a fen pwonei?

Me lükün ekkewe nimu oesini sia fen pworaus wor, ewe Paipel a pwal oesini eü mettoch mi mürinnö epwe fis lon ekkeei ränin lesopwoloon. Nengeni ei pworaus lon ewe awonuen oesini.

[Ekis Pwóróus lón pekin taropwe 8]

“Me rei usun itä ua fen pin fönüeni eü kinikinin paratis nge iei ua fönüeni eü leenien käpich mi poison.”​—ERIN TAMBER, IMWAN A NOM OROSETIN EWE SAT LON MERIKA, A FOSUN NGAWOLOON FÖNÜAN WE REN NICHIN EWE OIL LON EWE SETIN MEXICO LON 2010.

[Pwóór lon pekin taropwe 8]

Itä a Popu seni Kot?

Pokiten Paipel a oesini ngawoloon napanapen fönüfan ikenäi, weween Kot a efisiir? Ekkeei riäfföü sia kükküna ra itä popu seni Kot? Ka tongeni küna pölüwen ekkena kapas eis seni ewe puk Met Ewe Paipel a Wesewesen Apasa? sopwun 11, förien Chon Pwäratä Jiowa.

[Credit Line lon pekin taropwe 8]

U.S. Coast Guard photo