5. U odhnáb an tsabál

«[A Dios ne’ets kin] k’ibedha’ jita’ xe’ets ti k’ibedhom k’al jawa’ wa’ats tejé’ Tsabál.» (REVELACIÓN [APOCALIPSIS] 11:18)

● A Pirri u k’wajíl ti Kpor (Nigeria), in t’ojlábil pel kin ts’ejka’ i vino k’al i palmeras. Pero an petróleo axi u wak’láb ban ríos in odhnamal an palmeras. A Pirri in ulal: «An petróleo in tsemdhál an to’ol, tu ódhnanchal i t’u’úl ani an itse’. Yabáts u exlál jant’oj ne’ets ku t’aja’ abal ku ata’ i tumín».

JAWA’ WAT’ENEK. Talchik i atikláb axi exoblámadh in ulal abal támub ti támub, u wak’láb lej yan i amúl ban púlik lejem. Jajá’chik in tsálpanchal abal u wak’láb seis millones i toneladas k’al ts’ejel. Ts’ejel k’al nixé’ xi amúl pel i plástico, ne’ets ka owey cientos i támub abal ka k’atsej. An atiklábchik yab expidh in odhnál an Tsabál, jayej k’wajatchik in talál lej dhubat jawa’ wa’ats. An atiklábchik axi exoblámadh in ulal abal an Tsabál in yéjenchal diecisiete a its’ abal kin wa’tsindha’ jawa’ an atiklábchik in talál al jun i támub. An periódico Sydney Morning Herald in uluw: «Max an atikláb kin aynanchij ka yaney, ban támub 2035 ne’ets ki yéjenchij tsab i Tsabál abal ku k’wajiy».

JAWA’ TALCHIK IN ULAL. An atiklábchik lej tsalpadh. Ne’ets kin exla’ jant’oj kin t’aja’ abal yabáts kin odhna’ an Tsabál.

¿CHUBAX NIXÉ’? Yan i atikláb k’wajinek ti t’ojnal lej tsapik abal kin tólmiy axi más abal ka tsálpaxin, ani kin exbay abal kwa’al ki béletna’ an Tsabál. Bélits antsaná’, k’wajatej ti lej odhnáb an Tsabál.

¿JANT’OJ A TSÁLPAYAL? ¿A tsálpayal abal i yéjenchal tu ku tólmiy a Dios ani kin tsab ts’ejka’ an Tsabál, antsaná’ jant’ini’ in ulumal?

I exóbna’its bo’ i k’ej kaw axi an Biblia biyál in ulumal abal ne’etsak ka tejwaméj xowé’, pero jayej in uluw abal ne’etsak ka tejwaméj k’e’at jant’oj axi lej alwa’.

[Comentario]

«U kwa’alak jun i pejach i tsabál axi lej alwa’, pero xowé’ u eyendháb abal ka wak’láj i amúl.» (COMENTARIO DE ERIN TAMBER, RESIDENTE DE LA COSTA SUR DE ESTADOS UNIDOS, SOBRE LOS EFECTOS DEL DERRAME ­PETROLÍFERO DE 2010 EN EL GOLFO DE MÉXICO)

[Recuadro]

¿Pel in wálab a Dios?

An Biblia biyálits in ulumal abal ne’etsak ka wat’ey patal jawa’ xowé’ k’wajat i tsu’tal. Tam, ¿pel a Dios axi in t’ajál ka wat’ey patal axé’? Ne’ets ka ela’ an tok’tsixtaláb ban capítulo 11 in k’ál an libro ¿Qué enseña realmente la Biblia?, axé’ xi publicación pel in k’ál an ólchixchik k’al a Jehová.

[An dhabal kʼal an foto]

U.S. Coast Guard photo