Omaprofetero 5. Omanyoneno wehi

Mukuru ‘ma yandeke imba mbe nyona ehi.’—OMAVANDURURIRO 11:18.

● Omutengwa Pirri u ungura omavinu okuza pomaihi womiti, moKpor tja Nigeria. Omarandisiro we ya ṱunwa i yomaoli nga tikira monḓonḓu ndji Niger. Eye wa tja: “Oyo ya zepa omahundju wetu, ya ṱuna komikova vyetu kotutu nu ya zunḓa otuharwi twetu. Ami hee yenene okurihupisa rukwao.”

HAPO OMAPU YEṊE NGU MAYE ṊUNISA OTJIṊA HI? Otja kovakonḓonone tjiva, ondova yozotona nḓe ṱa pomangete hamboumwe nokanḓe nondando i imbirahiwa momuronga ombura aihe mouye. Ozopresente ape 50 zondova ndjo, ozonairona nḓe kambura ozombura ozengi okunyanyauka. Ovandu kave zunḓa ehi uriri, nungwari wina ve ungurisa ovimemwa vyokuti ngandu tji vya henduruka. Omakonḓononeno ye raisa kutja ehi ri hepa ombura imwe nomieze vitano okuyarurapo oviṋa mbya ungurisiwa i yovandu mombura imwe. Ongoramambo ndji o-Sydney Morning Herald ya Australia ya tja: “Otjivarero tjovandu nomaungurisiro woviṋa tji mavi kurire ko, matu kahepa ehi oritjavari mo 2035.”

OVANDU OVENGI VE PIRURA VI OUMUNE MBWO? Owo ve tja, ovandu ve nounongo. Nu mave yenene okuṱuna omauzeu ngo kutja ve yame ehi.

HAPO OUMUNE MBWO OUATJIRI? Ovimbumba poo ovandu mbe ungura oukukutu va yandja ondjivisiro ohunga nondjeverero yozondendera zokuti. Posi yokutja, ehi ri zunḓakera ko tjinene.

HAPO OVE U NOUMUNE UṊE? Hapo matu hepa Mukuru okuyama ehi retu konyoneno otja pa kwizika?

Otja komaprofetero yetano ngu twa hungirire ko, Ombeibela wina ya hunganeka oviṋa oviwa momayuva omasenina. Tara kotjihorera tjimwe momaprofetero oyetjahamboumwe.

 [Blurb]

“Ami mba pandjara oruveze rwandje ndwa ri tjimuna oparadisa indu tji rwa rira oruveze pu pe imbirahiwa ondova ndji zunḓa okuti.”​—ERIN TAMBER, NGWA TURA MO UNITED STATES MEṊE YORUTJIVA RWA MEXICO, OHUNGA NOUMBA WOMAOLI NGA TIKIRA MORUTJIVA RWA MEXICO MO 2010.

[Box]

Hapo Mukuru ongu eta omauzeu ngu tu muna?

Mena rokutja Ombeibela ya hunganeka oviṋa ovivi mbi tjitwa ndino, hapo iho matji hee kutja Mukuru ongu nomerizirira navyo? Hapo ongu tjita kutja tu mune omauzeu? Mo yenene okumuna omaziriro omakovise komapuriro ngo, mekondwa 11 rembo ndi Ombeibela mai yenene okutuhonga tjike? nda pitisiwa i yOvahongonone va Jehova.

[Picture Credit Line]

U.S. Coast Guard photo