Jaku Benabi 5. Bumi Dirusak

“[Petara deka] ngerusak sida ke nyadi pengerusak dunya.”—PEMANDANG 11:18.

● Encik Pirri, seiku ari orang ke nangkal ngulihka ai ijuk ba Kpor, Nigeria. Pengidup iya nyau berubah ketegal minyak ke naya ba Delta Niger. Ku iya muchau, “Semua ikan mati. Kulit kami pan rusak lalu ai sungai pan kamah.”

NAMA FAKTA IYA? Nitihka sekeda pakar, 6.5 juta tan utai kamah ngamahka tasik ninting taun. Kira-kira 50 peratus utai kamah nya plastik ke melepu pengelama beratus taun sebedau iya lela. Kelimpah ari nya, mensia ngena kelalu mayuh utai tumbuh lalu enda pedulika asil iya dudi hari. Nitihka pansik, bumi begunaka setaun lima bulan, kena ngasilka utai ti diguna mensia dalam setaun. Enti utai tu majak nyadi, ba taun 2035, kitai deka begunaka dua iti Bumi kena nampung utai ke diguna mensia,” ku Sydney Morning Herald.

NAMA RUNDING SEKEDA ORANG? Mensia pintar, lalu ulih mutarka penanggul tu. Kitai ulih ngaduka bumi.

KATI RUNDING TU BETUL? Mayuh pengawa udah digaga orang sereta pertubuhan, ngambi mayuh orang nemu pasal penanggul ba alam sekitar. Tang, pengamah ba dunya tu majak balat.

NAMA RUNDING NUAN? Kati mensia begunaka Petara kena nyelamatka bumi kitai?

Pengudah mansik lima iti jaku benabi, aram kitai meda siti agi jaku benabi ke ngalitka ati pasal hari ti penudi.

[Blurb]

“Aku ngasaika Paradais ke enggi aku, udah nyadi palan muai utai ti kamah.”—ERIN TAMBER, KE DIAU BA TEBING TASIK TELUK AMERIKA SERIKAT MADAH PASAL MINYAK KE NAYA BA TELUK MEXICO KENA 2010.

[Kutak]

Kati Petara Bertanggungjawap?

Ketegal Bup Kudus madahka utai jai ke nyadi kemayaharitu, kati tu reti iya Petara ke betanggungjawap ngagai semua penyai ke nyadi? Kati Iya ngasuh kitai merinsa? Nuan ulih ngiga saut ke ngemuaska ati ngagai semua tanya tu, ba pelajar 11 bup Nama Ulih Dipelajarka Kitai ari Bup Kudus ti dikeluarka Saksi-Saksi Jehovah.

[Picture Credit Line]

U.S. Coast Guard photo