Profesiya 5. Kadaral na Planeta nga Davvun

‘Daralan noka na Dios i totolay nga namarattal toye ta utun na davvun ta panara-daral.’—NEPAKANNAMMU 11:18.

● Makkokkolekta tu tuba onu palm wine si Mr. Pirri ta Kpor, Nigeria. Nafektan i pagaleganna ta grabe nga oil spill ta Niger Delta. “Pinatay natun i manango mi, zinaralna i tabbi mi, anna zinapinganna i dana-danummi,” kunna. “Awan ngana tu pagalegakku.”

ANNI I IPASINGAN NA REPORT IRA? Segun ta karuan nga eksperto, kada ragun, 6.5 million nga tonelada na basura i metabbo ta bebay. Plastik i ma-50 porsiento tatun ira nga basura nga meyana-anug ta magatu nga daga-ragun nige nga mavunno. Fuera paga ta polusion ta interu mundo, kebbi nga ufutan na totolay i natural nga kayamanan na davvun. Ipasingan na research ira nga kawagan na planeta nga davvun i tanga ragun anna lima vulan tapenu itoli i kinonsumo na totolay ta tanga ragun. “Nu tulu-tuloy i pakkaru na populasion anna pakkonsumo, kawagattam i dua nga planeta nga Davvun ta 2035,” nireport na diariu ta Australia nga Sydney Morning Herald.

ANNI I OPINION NA KARUAN? Malalaki i totolay nga magaleg tu solusion. Masolba tam danaw nga problema anna ari nga madaral i planeta nga davvun.

KURUG KARI YATUN? Kukukuan na aru nga totolay i adde na mawayyada tapenu mapagimmang i polusion. Ngem maski nu kunna, dakal lapa nga problema i polusion.

ANNI I MAKAGIM? Kawagattam kari i uffun na Dios tapenu ari nga tulu-tuloy nga madaral i planeta tam, gitta na nepromesana nga kuan?

Fuera paga ta lima nga profesiya nga nekonsidera, niprofesiya gapa na Biblia i makasta ira nga mesimmu ta pangurianan ira nga aggaw. Ikonsidera tam i meka-annam.

[Blurb ta pahina 8]

“Napannu ngana tu kappatay nga basura i sular ku nga dati abbo ku nga gittana paraiso.”​—KINAGI NI ERIN TAMBER NGA TAGA-GULF COAST, UNITED STATES MEYANNUNG TA EFEKTO NA OIL SPILL TA GULF OF MEXICO TA 2010.

[Box ta pahina 8]

Dios Kari i Makalliwa?

Megafu ta neprofesiya ta Biblia i marake ira nga mesissimmu sangawe, kayà kari kagian natun nga Dios i makalliwa? Yayya kari i makegafu nu ngatta mazziga-riga ittam? Matabbag danatun nga pakkiavu ta kapitulo 11 na libru nga Anni Talaga i Ituttuddu na Biblia? nga nipublisa na Saksi ira ni Jehova.

[Picture Credit Line ta pahina 8]

U.S. Coast Guard photo