Obuminyereri 5. Eritsandibwa ly’Ekihugho

‘Nyamuhanga akendisya thoghothya abandu abakatsandaya ekihugho!’​—ERIBISULIRWA 11:18.

● Mr. Pirri akakolha obwabu obukalhua omwa mithi y’amangasi omwa Kpor, e Nigeria. Esuburu yiwe yabirihambwako nabi busana n’ebighutha binene ebya sandakalha erilhua omwa Niger Delta. Akabugha athi “Bik’itha amahere wethu, ibyatsandya engoba y’okwa mibiri yethu, ibyatsandya ehyusi. Singwithe eyindi nzira ey’eribaniramu ebiyithawa byaghe.”

OBWEMA BUKAKANGANAYAKI? Erikwamana n’abasomire, oburofu bunene kutsibu bukuthibawa omwa syongetse nene-nene omwa kihugho kyosi obuli mwaka. Hakuhi pasente 50 esy’oburofu obo ni plastik eyikendi syaghunza ebikumi by’emyaka imuyabulirana. Eryongera okw’itsandya ekihugho, abandu bane mwongera eritsandya kutsibu ebindu by’obuhangwa. Erisekulya likakanganaya ngoku ekihugho kikayithagha omwaka mughuma n’amezi athano erithoka erisuba-subania ebya bandu bakakolesaya omo mwaka mughuma. Olhupapura lhw’amakuru e Australian olhwa Sydney Morning Herald mulhwabugha lhuthi: “Omughanzo w’abandu n’emibere ebindu bikakolesibawamo byamalholha embere eriyongera, aha thukendi syahikira omo mwaka wa 2035, ithukendi syayithagha omwanya ow’ingene-ngene n’Ebihugho bibiri.”

NI MALENGEKANIA WAHI AWAKANYIRIRE? Abandu bawithe amenge kandi bangana thoka eribana enzira ey’erighunziramo ebitsibu. Thwangana ghunzaho ebitsibu ebi n’erilhamya ekihugho.

MBWINO AMALENGEKANIA AYA ANAHIKIRE? Abandu bangyi n’ebithongole muthina-muthina babirilengaho eribwira abandu okwa mughaso w’eritsomana eby’obuhangwa. Nomwabine bithya, ekihugho kinemulholha embere eritsandibwa kutsibu.

WUKALENGEKANAYA WUTHIKI? Mbwino Nyamuhanga anayitheghisibirwe eringira omo myatsi n’erilhamya ekihugho kyethu okw’itsandibwa ngoku anabiriyilhagha?

Eryongera okwa maminyereri athano agho thwamabirikaniako, e Biblia kandi muyalhaghulha okwa bibuya ebyangabere omwa biro by’enyuma-nyuma. Thuthalebya eky’erileberyako kighuma omwa buminyereri bw’omukagha.

[Eblabbu]

“Ngayowa nga singakiri omo mwanya owuwene ng’eparadiso aliwe lino ngali omo omwanya owali mw’oburofu bw’obutwa.”​—EBINYWE BYA ERIN TAMBER, ENDULHANI YE GULF COAST, UNITED STATES, EBIHAMBIRE OKWA BYALHWIRIRIRA OMWA BIGHUTHA EBYASANDAKALHA ERILHUA OMWA GULF E MEXICO 2010.

[Akasanduko]

Mbwino Nyamuhanga Yukaleka Ibyabya?

Kundi e Biblia muyalhaghulha ebindu ebithuwene ebya thukalhangira munabwire, mbwino ekyo kinatholere ikyaleka ithwabugha thuthi Nyamuhanga yukaleka ibyabya? Mbwino yukathulethera eriaghalhwa? Wangana bana eby’erisubirya ebitholere okwa bibulyo ebyo omwa erisomo 26 omwa kitabu Tsemera Engebe Kera na Kera! ekyahulhukibawa n’Abema ba Yehova.

[Ahalhuire ekisasani]

U.S. Coast Guard photo