Ungunza 5. E nza mu Fwaswa ina

“[Nzambi] ofwasa awana befwasang’e nza.”—LUSENGOMONO 11:18.

● Pirri, yakala dimosi kuna Nigéria, malavu ma nsamba kalwazanga. E fulu kalwazilanga kiazala ye ulolo wa piti yatuka kuna zunga kia Delta do Níger. Pirri wavova vo: “E piti yavonda e mbizi zeto, yayivisa nkand’a nitu eto yo safula nkoko mieto. Kiakala diaka ye una ndenda kuyidikila ko.”

MAMBU MEBWANGA NKIA ZIKU MESONGANGA? Akwa ngangu bevovanga vo konso mvu, mvindu yayingi yitubwanga muna kalunga ya nza yawonso. Muna mvindu yayi, muna ye ulolo wa lekwa ke ivika wolanga ko kana nkutu nkama za mvu. O wantu ke besafulanga kaka ntoto ko, kansi besafulanga mpe ulolo wa lekwa ina mo. O lufimpu lwavangwa lusonganga vo, vava wantu bevatanga o ntoto yo kuna mbongo mu mvu mosi, o ntoto uvavanga vo wavundiswa mu mvu mosi ye ndambu kimana watoma yima diaka e mbongo. Muna zulunalu ya Austrália, Sydney Morning Herald, mwasonama vo: “Avo lutangu lwa wantu mu nza luwokele kumosi mpe ye awana besumbanga madia yakuna mvu wa 2035, ntoto wakaka tuvwa o mfunu.”

WANTU ADIEYI BETOMA VOVANGA? O wantu vangwa ya ngangu, balenda baka nzengo zambote muna fokola e mpasi. Tulenda fokola e diambu diadi diampasi yo lunga-lunga o ntoto.

NGA E MVOVO MIAU MIALUDI? Wantu ayingi besalanga e salu ya yau kibeni ye ya kompani, betoma sianga e sungididi muna kalu kia wantu. Kana una vo i wau, e nza yawonso mu safulwa kaka ina.

ADIEYI OBENZE? Nga diamfunu vo o Nzambi katanina e nza yayi yalembi fwaswa nze una kasia o nsilu?

Vana ntandu a ungunza tanu tubadikidi, Nkand’a Nzambi uyikanga mpe mambu mambote mevangama mu lumbu yambaninu. Tala e ziku kia diambu diadi muna ungunza wa sambanu.

[Mvovo mia Fwaniswa mina muna lukaya lwa 8]

“Yakala ye paradiso ame, o wau yakituka se fuku dialozelwa matiti.”​—U KAVOVA ERIN TAMBER, OZINGILANGA MU MBANZ’A COSTA DO GOLFO DOS ESTADOS UNIDOS, MU KUMA KIA SUMBULA YA PITI YAMWANGANA MUNA MBANZ’A GOLFO DE MÉXICO MU MVU WA 2010.

[Babu muna lukaya lwa 8]

Nga Nzambi Nkwa Kuma?

Wau vo Nkand’a Nzambi usakulanga e mambu mampasi mebwanga o unu, nga e diadi disongele vo Nzambi otwasanga zo? Nga Nzambi okutumwesanga e mpasi? Olenda solola e mvutu za lufiaulwisu za yuvu yayi muna kapu kia 11 kia nkanda, O Nkand’a Nzambi Adieyi Kieleka Kelonganga? wavaikiswa kwa Mbangi za Yave.

[Avwe a foto muna lukaya lwa 8]

U.S. Coast Guard photo