5. Ku Shandaula Lifasi

“[Mulimu u ka] yundisa ba ba shandaula lifasi.”—SINULO 11:18.

● Bo Pirri ba sebeza musebezi wa ku panga waine mwa munzi wa Kpor ili mwa naha ya Nigeria. Pisinisi ya bona i wisizwe ki mafula a mañata a na suluhezi fa maalo a nuka ya Niger. Bo Pirri ba bulela kuli: “Mafula ao naa bulaile litapi, naa sinyize matalo a luna, ni milapo ya luna. Ha ni sa na fa ku ipiliseza.”

ZE EZAHEZI LI BONISAÑI? Ka ku ya ka licaziba ba bañwi, masila a eza litani ze 6.5 milioni, a yumbelwanga mwa mawate silimo ni silimo. Mi licika la masila ao ki mapulasitiki a nganga lilimo ze ñata-ñata kuli a kone ku bola. Kwandaa ku shandaula lifasi, batu ba sweli ku fukuza hahulu lifa za lifasi ka sipimo se si sabisa. Lituto li bonisa kuli ku ka nga silimo ni likweli ze ketalizoho kuli lifasi li kone ku ncaafaza lika ze sinyizwe ki batu mwa silimo. Mutende wa kwa naha ya Australia wo bizwa Sydney Morning Herald u bulela kuli: “Haiba palo ya batu ni muitusisezo wa lifa za lifasi li zwelapili, lu ka tokwa mafasi a mabeli ka silimo sa 2035.”

BATU BA HANYEZANGAÑI? Batu ba butali mi ba na ni buikoneli bwa ku kona ku tatulula butata bo ba talimana ni bona. Lwa kona ku feza butata bo, ni ku bukeleza lifasi.

KANA KU HANYEZA KO KWA UTWAHALA? Buñata bwa batu ni likopano ze sebeza ka taata, ba lemusa batu ka za litaba ze ama ku sinyeha kwa lifasi. Niha ba eza cwalo, lifasi li zwelapili ku shandaulwa hahulu.

MINA MU BONA CWAÑI? Kana lwa tokwa kuli Mulimu a bukeleze lifasi la luna kwa ku sinyiwa, ku likana ni mwa sepiselize?

Kwandaa bupolofita bo buketalizoho bo lu sa zo nyakisisa, Bibele hape ne i polofitile lika ze nde ze ne ka ezahala mwa mazazi a maungulelo. Ha lu nyakisiseñi mutala u li muñwi mwa bupolofita bwa bu 6.

[Manzwi a fa likepe 8]

“Ni ikutwa inge kuli ni latehezwi ki sibaka se si swana sina paradaisi mi se ni pila mwa sibaka se si lubeta ili mo ku yumbelwa manyalala.”—BO ERIN TAMBER, BA BA PILA KWA GULF COAST, MWA UNITED STATES, BA BULELA ZE NE EZAHEZI KABAKALA MAFULA A NA SULUHEZI MWA SIKO SA MEXICO MWA SILIMO SA 2010.

[Mbokisi fa likepe 8]

Kana Mulimu ki Yena ya Tahisa Miinelo ye Maswe?

Bakeñisa kuli Bibele ne i bulezi cimo miinelo ye maswe ye lu bona kacenu, kana fo ku talusa kuli Mulimu ki yena ya i tahisa? Kana wa lu tahisezanga manyando? Mwa kona ku fumana likalabo ze kolwisa kwa lipuzo zeo mwa kauhanyo 11 ya buka ya Bibele I Lutañi Luli? ye hatisizwe ki Lipaki za Jehova.

[Manzwi a bañi ba siswaniso fa likepe 8]

U.S. Coast Guard photo