Inatiri 5. Utankanyiya Itthaya

“Nluku naahala waatankanya ale antankanya itthaya.”​—APOKALIPISE 11:18.

● Nloophwana mmoca neehaniya Pirri nokhala u Kpor, ilapo yo Nigéria, novara nteko woopanka iviinyu yokole. Ntekwaawe uhotankanyiya nlattu wowiitthya petróleo mooloko wo Níger. “Iyo itthwiiyo ineera yeevakacaka ihopacihu, inaanari irutthwiihu ni myooloko cihu,” nohimya Pirri. “Akirina-tho mananna owiilihera.”

CITTHU CINKHUMELELA CINTHOONYERA ISIYANI? Anamasoma aneera wiira khula mwaakha, mpahari cinaariheliya ikokhola itonelada 6,5 imiliyau cene. Ni uneeriya wiira nnyo ikokholannyo 50% cinkhalaka caarampo anvirihaka myaakha-myaakha cene ahinaaya wuntta. Apinaatamu uhiya paasi unanariha itthaya, ciicammo aneera yamalamalihaka citthu cimphwanyanna watthayani nimananna ootikhiniha. Usomasomiya waya itthaya, uhooneneliya wiira citthu cimphwanyanna watthanyi, cinvarelaaya nteko apinaatamu nhina mwaakha mmoca, wiira cituruwele khampa caaryaaya uhaana uviraka mwaakha mmoca ni myeeri mithanu. “Wakhalaka wiira apinaatamu khanhala uhiyerera winciva ni khanhala uvukula mananna cinvarelakaaya nteko nnyo citthunyo, mpaka mwaakha wo 2035 ninaahala uphela ukhalana itthaya ikhwaawe,” ineera ijornaali yo Australia Sydney Morning Herald.

ISIYANI ATTHU ENCI INHIMYAAYA? Apinaatamu akhanle atthu oocuwelaca. Hiiva ninaakhitiri upanka itthu wiira itthaya uturuwele ukhala yomaana.

NIIREKE IYO IKHANLE IKHWEELI? Cihaavo miphwinko ni atthu enci anaahimyeera akhunanaya nlattuni unaareera uhitankaya citthu cimphwanyannya watthayani. Masi uhookhalaru commo, itthaya nanlelo ineera itankanyiyaka venci cinene.

NYUUVA NNOONELA CANI? Niireke wanawoonannya wiira unaareera Nluku wiirannyeeha inatiri ikhuluvelihilyaawe wiira ila itthanyeela ihitankanyiye?

Uhiya paasi inatiri thanu coopeliye mwahanya va, ciicammo Ibiiblya inaahimyaca citthu comaana caahala ukhumelela mahuku ookhicera. Moone itthu imoca nhina inatiri yonasiita.

[Moolumo o wapaaginani ootepa woonannya 8]

“Mi kaari mwaneene ipeepho yankaani; nna co kimwaneene ncala.”​—ERIN TAMBER, NLOPWANA NOKHALA U ESTADOS UNIDO, NCOKO WOWAATTAMANANA UPAHARI, OOLUMACA COMMO, OOPELAKA MWAHA ITTHU IMWIIRANNYENLE NLATTU WOWIITTHYA PETRÓLEO U MÉXICO MWAAKHA WO 2010.

[Ikwaaturu wapaaginani 8]

Niireke Nluku phinkhumeleliha?

Nlattu Ibiiblya woohimya khalayiiru wiira canhala wiirannya citthu coohinamaana cineerannya mahukwaala, niireke iyo ioonihera wiira Nluku phinkhumeleliha nnyo citthunnyu? Uyo phinniwaanela mahuviho? Nyuuva pooti uphwanya waakhuliya waya ala makohwaala nhina ikapiitulu 11 yo ilivuru Ibiiblya ineetthuciha isiyani? ipankiye ni Masaahiti a Yehova.

[Mwaneene ilatarato iri ipaagina 8]

Ilatarato yo U.S. Coast Guard