5. Kisokiuiaj Tlaltipaktli

“Tikintsontlamiltis inijuantij tlen tlaxoleuayayaj ipan Tlaltipaktli” (APOCALIPSIS 11:⁠18).

● Pirri kinamaka vino de palma ipan Kpor (Nigeria), kema toyajki petróleo ipan delta del Níger uajki nopa palmeras kampa kikixtiyaya vino. Ya kiijtoua: “Nopa petróleo kisokiuia ueyatl, kinmiktia michimej uan kitlanauia totlakayo. Nama ayokmo nijpia tekitl”.

¿TLAKE KINEXTIA TLEN PANOTOK? Ixtlamatinij kiijtouaj sejse xiuitl kitepeuaj ipan ueyi atl seis millones uan tlajko toneladas tlasoli. Tlajko tlen nopa tlasoli eli plásticos tlen uejkaua miak xiuitl ixpoliui. Maseualmej amo san kisokiuiaj Tlaltipaktli, nojkia kitlamiltijtiauij kuajkuali tlamantli tlen onka. Ixtlamatinij kiijtouaj moneki panos diecisiete metstli uan kiampa sampa tlaelis ipan Tlaltipaktli tlen maseualmej kitekiuijkej ipan se xiuitl. Nopa periódico Sydney Morning Herald, kiijtoua: “Ipan 2035 monekis tijpiasej ome Tlaltipaktli tlaj maseualmej nojua tlauel momiakilisej uan nojua tlauel kitekiuisej tlen onka”.

TLEN SEKIJ KIIJTOUAJ. Maseualmej tlauel tlalnamikij uan kimatij kenijkatsa ayokmo tlauel kisokiuisej Tlaltipaktli.

¿NELIA TLEN KIIJTOUAJ? Miakej katli mosentikapaleuiaj uan sekinok maseualmej, tematiltiaj kenijkatsa ayokmo kisokiuisej Tlaltipaktli. Maske kiampa kichiuaj, maseualmej nojua tlauel kisokiuiaj Tlaltipaktli.

¿TLAKE TIMOILJUIA? ¿Timoiljuia toTeotsij moneki ma techpaleui uan kiampa ayokmo kisokiuisej Tlaltipaktli, kej ya kiijtojtok?

Biblia amo san kiijtok kenijkatsa moaxitiskia ni makuili tlajtolpanextili tlen tikitakej, nojkia kiijtok kuajkuali tlamantli tlen panoskia. Ma tikitakaj seyok tlajtolpanextili.

[Tlajtoli tlen pankisa]

“Achtoui niitstoya kampa tlauel tlayejyektsi uan nama niitstok kampa tlasoltepeuaj” (TLEN KIIJTOK ERIN TAMBER KEMA TOYAJKI PETRÓLEO IPAN 2010 IPAN GOLFO DE MÉXICO, YA ITSTOK IPAN COSTA SUR TLEN ESTADOS UNIDOS).

[Recuadro]

¿Timoiljuia itlajtlakol toTeotsij?

Biblia kiijtok ipan ni tonali tijpiaskiaj miak tlaouijkayotl. Uajka, ¿timoiljuia toTeotsij kichiua ma titlaijiyouikaj? Uelis tikitas kenijkatsa monankilia ni tlajtlanili ipan tlamachtili 11 tlen amochtli ¿Tlake nelnelia tlamachtia Biblia?, tlen kichijtokej Jehová itlajtoltemakauaj.

[Katli iaxka tlaixkopinkayotl]

U.S. Coast Guard photo