5. Ukubhubhisa Umhlaba

‘[UNkulunkulu] uzabhubhisa ababhubhisa umhlaba.’—ISAMBULO 11:18.

● Umnumzana Pirri ohlala eKpor eNigeria wenza iwayini esebenzisa umsobho wesihlahla selala. Kodwa ukuchithekela kwe-oyili emfuleni omkhulu okuthiwa yiNiger Delta kwawuphambanisa kakhulu umsebenzi wakhe. Umnumzana Pirri uthi ingozi le ibangele ukuthi inhlanzi ezinengi zife, yenza lamanzi asezifudlaneni abakha kuzo aba yingozi njalo yatshiya abanengi bengasenelisi ukuphandela izimuli zabo.

UBUFAKAZI BUTSHENGISANI? Ezinye ingcitshi zithi kungena ingcekeza engaba ngamathani angu-6,5 miliyoni elwandle umnyaka ngamunye. Amaphesenti angaba ngu-50 engcekeza leyo yizinto ezenziwe ngeplastiki futhi kuthatha iminyaka leminyaka ukuthi zibole. Abantu bayawungcolisa sibili umhlaba kodwa abapheleli khonapho, baphinda baphambanise lemvelo. Abachwayisisayo bathi umhlaba ufuna umnyaka lezinyanga ezinhlanu ukuthi uphinde ube lezinto eziqedwa ngabantu ngomnyaka owodwa nje kuphela. Iphephandaba le-Australia okuthiwa yi-Sydney Morning Herald lithi: “Nxa abantu bangaqhubeka besiba banengi njalo besebenzisa izinto zemvelo ngendlela abenza ngayo khathesi, kuyabe sekufunakala umhlaba wesibili ngomnyaka ka-2035.”

OKUJAYELE UKUKHULUNYWA NGABANGAVUMELANI LESIPHROFETHO LESI. Umonakalo osemhlabeni uyalungiseka ngoba abantu balolwazi lokuthi bangawuvikela njani umhlaba.

ABAKUTSHOYO KULIQINISO YINI? Lanxa kulenhlanganiso ezinengi labantu abakukhuthaleleyo ukulimukisa abanye ngokuqakatheka kokuphatha kuhle imvelo, umhlaba ulokhu ungcoliswa kakhulu.

UCABANGANI? UNkulunkulu uzangenela yini njengokuthembisa kwakhe ukuze umhlaba ungaqhubeki ungcoliswa uze ucine utshabalala?

IBhayibhili lilesinye isiphrofetho esikhuluma ngokuhle okwenzakala ezinsukwini zokucina. Asixoxe ngesiphrofetho leso esihlokweni esilandelayo.

[Umfanekiso osekhasini 8]

Omunye ohlala ekhunjini lolwandle wathi: “Indawo engangihlala kuyo yayinhle okwamagama, kodwa khathesi isingokunye.”—U-ERIN TAMBER, ISAKHAMUZI SEGULF COAST, E-UNITED STATES NGEMVA KOKUCHITHEKA KWE-OYILI NGO-2010.

[Umfanekiso osekhasini 8]

NguNkulunkulu Yini Obangela Konke Lokhu?

NguNkulunkulu yini obangela izinto ezimbi esizibona emhlabeni lamuhla? Nguye obangela ukuthi sihlupheke yini? Izimpendulo zemibuzo le ungazithola kusahluko 11 ebhukwini elithi IBhayibhili Lifundisani Sibili? elidindwe ngoFakazi bakaJehova.

[Picture Credit Line on page 8]

U.S. Coast Guard photo