5. Go Senywa ga Lefase

“[Modimo o tla] senya bao ba senyago lefase.”—KUTOLLO 11:18.

● Mna. Pirri o šoma go dira beine ya mopalema kua Kpor, Nigeria. Kgwebo ya gagwe e ile ya senywa ke go tšhologa mo gogolo ga oli kua Teltheng ya Niger. O re: “E bolaya dihlapi tša rena, e senya letlalo la rena e bile e šilafatša dinoka tša rena. Ga ke sa kgona go iphediša.”

DITHEREŠO DI BONTŠHA ENG? Go ya ka ditsebi tše dingwe, ditone tše dimilione tše 6,5 tša ditšhila di tsena ka lewatleng ngwaga o mongwe le o mongwe. Go akanyetšwa gore 50 lekgolong ya ditšhila tšeo ke polasitiki yeo e tlago go tšea nywagakgolo pele e ka onala. Ntle le go šilafatša lefase, batho ba fetša ditšweletšwa tša lona tša tlhago ka lebelo le le boifišago. Dinyakišišo di bontšha gore lefase le nyaka ngwaga le dikgwedi tše hlano gore le tsošološe seo batho ba se dirišago ka ngwaga. Kuranta ya Australia ya Sydney Morning Herald e bega gore: “Ge mokgwa wa go šilafatša le go diriša ditšweletšwa tša lefase o ka tšwela pele, ka 2035 re tla be re nyaka mo e ka bago Mafase a mabedi.”

KGANETŠO E TLWAELEGILEGO KE EFE? Batho ba na le bohlale e bile ba kgona go hwetša ditharollo tša mathata. Re ka dirolla mathata a gomme ra phološa lefase.

NA KGANETŠO YEO E A KWAGALA? Batho ba bantši ba šomago ka thata le dihlopha ba dirile gore go lemogwe dikgang tša mabapi le boemo bja tikologo. Lega go le bjalo, lefase le tšwela pele le šilafatšwa ka tekanyo e kgolo.

O NAGANA’NG? Na go a nyakega gore Modimo a tsene ditaba gare gomme a phološe lefase gore le se sa senywa—bjalo ka ge a holofeditše go dira bjalo?

Go tlaleletša go diporofeto tše hlano tšeo di sa tšwago go sekasekwa, Beibele e boletše e sa le pele ka ditiragalo tše di kgahlišago tšeo di bego di tla direga mehleng ya bofelo. Ela hloko mohlala o tee boporofeteng bja botshelela.

[Ntlhakgolo go letlakala 8]

“Ke ikwa eka ke tlogile go beng mong wa paradeise go ya go beng mong wa lefelo la go lahlela ditšhila tše nago le mpholo.”—ERIN TAMBER, MODUDI WA GULF COAST, UNITED STATES, MABAPI LE DITLAMORAGO TŠA GO TŠHOLOGA GA OLI KA 2010 KUA KGOGOMETŠANENG YA MEXICO.

[Lepokisi go letlakala 8]

Na ke Modimo yo a Ikarabelago?

Ka ge Beibele e boletše e sa le pele ka maemo a mabe ao re a bonago lehono, na se se dira gore Modimo e be yena yo a ikarabelago ka ona? Na o re bakela tlaišego? O ka hwetša dikarabo tše di kgotsofatšago tša dipotšišo tšeo go kgaolo 11 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

[Mothopo wa Seswantšho go letlakala 8]

U.S. Coast Guard photo