Ngapezo 5. Bɛlɛsɛkye Azɛlɛ Ne

“[Nyamenle bazɛkye] bɛdabɛ mɔɔ bɛsɛkye azɛlɛ ye la.”—YEKILE 11:18.

● Yɛmenle Pirri ka nza wɔ Kpor mɔɔ wɔ Nigeria la. Nwole bie mɔɔ butule Niger Delta ne anu la ɛzɛkye ye gyima ne bɔkɔɔ. Ɔse, “Nwole ne ku yɛ fɛlɛ, ɔsɛkye yɛ nwo nane, ɔsɛkye yɛ azule. Mɔɔ medi bɔbɔ la ɛbɔ me.”

DASELƐ BONI A WƆ ƐKƐ A? Mbɔlɔba bie mɔ kile kɛ ɛwula mɔɔ le tone mgbe 6.5 la kɔ nyevile ne anu ɛvolɛ biala. Ɛwula ɛhye anu ɛya ngyɛnu 50 le wolɔba mɔɔ bali ɛvolɛ ɛya ɛya kolaa na yeakpɔlɔ a. Yeanga ye zɔ, menli ɛlɛsɛkye ninyɛne mɔɔ wɔ azɛlɛ ye azo mɔɔ bie a le mbaka la. Neɛnleanu kile kɛ azɛlɛ ne hyia ɛvolɛ ko siane nnu na yeazia yeanyia ninyɛne mɔɔ menli sɛkye ye wɔ ɛvolɛ ko anu la. Australia adwelie kɛlata bie mɔɔ bɛfɛlɛ ye Sydney Morning Herald la bɔ amaneɛ kɛ: “Saa menli ne dodo nee kɛzi bɛfa ninyɛne mɔɔ wɔ azɛlɛ ne azo bɛdi gyima la kɔ zo zɛhae a, ɔkadwu ɛvolɛ 2035 la yɛbahyia Azɛlɛ ye mɔɔ yɛde zo la kɛyɛ nwiɔ.”

DUZU A MENLI TA KA A? Menli ze nrɛlɛbɛ kpalɛ yɛɛ bɛkola bɛnwu ngyegyelɛ dɔɔnwo sɔbelɛ. Yɛbahola yɛazi ngyegyelɛ ɛhye anloa na yɛayɛ azɛlɛ ne boɛ.

ASOO ƆLE NƆHALƐ? Menli anzɛɛ ekpunli bie mɔ ɛbɔ azɛlɛ ne mɔɔ bɛlɛsɛkye ye la anwo kɔkɔ fane dɔɔnwo. Noko, bɛtɛsɛkye azɛlɛ ne na ye ɛzɛkyelɛ ne bɔbɔ ɛyɛ kpole.

KƐ WƆ ADWENLE SE WƆ Ɛ? Asoo ɔwɔ kɛ Nyamenle yɛ azɛlɛ ne mɔɔ bɛlɛsɛkye ye la anwo debie kɛmɔ yebɔ nwolɛ ɛwɔkɛ la ɔ?

Mɔɔ boka ngapezo nnu ne mɔɔ yɛha nwolɛ edwɛkɛ anwo la, Baebolo ne eza hanle ninyɛne kpalɛ mɔɔ ɔbahɔ zo wɔ awieleɛ mekɛ ne anu la noko dole ɛkɛ. Maa yɛnlea neazo ko wɔ ngapezo mɔɔ tɔ zo nsia la anu.

[Edwɛkɛ mɔɔ bɛkpa wɔ mukelɛ 8]

“Ɔle kɛ asɛɛ ɛnee melɛ azɛlɛ mɔɔ zolɛ le kɛnlɛma na akee azɛlɛ mɔɔ ɛwula ngome a wɔ zo la ɛrali ɔ gyakɛ anu la.”—ERIN TAMBER, MƆƆ DE UNITED STATES, GULF COAST, EDWƐKƐ MƆƆ ƆHANLE YE WƆ NWOLE BIE MƆƆ BUTULE WƆ MEXICO NYEVILE NE ANU WƆ 2010 ANWO LA.

[Ɛlɛka wɔ mukelɛ 8]

Asoo Ɔvi Nyamenle?

Kɛmɔ Baebolo ne hanle dole ɛkɛ ne kɛ ninyɛndane ɛhye mɔ basisi la ati, asoo Nyamenle a ɛlɛmaa basisi a? Asoo ɔdaye a ɔmaa yɛnwu amaneɛ a? Ɛbanwu kpuyia ɛhye mɔ anwo mualɛ wɔ Duzu A Baebolo ne Kilehile Amgba A? buluku ne mɔɔ Gyihova Alasevolɛ ɛyɛ la tile 11.

[Nvoninli Ɛvileka wɔ mukelɛ 8]

U.S. Coast Guard nvoninli