5. Kʼahchiʼ ruyojarik wach i akʼal

«[Reʼ Dios] narusacham kiwach taqeh i kʼahchiʼ kiyojom i akʼal» (APOCALIPSIS 11:18, TNM)

● Reʼ Pirri irukʼayej vino reh palma ar Kpor (Nigeria), xa reʼ laʼ xuqʼebʼ i rukamaj wilih ruum chi xchihkik i petróleo ar Nigeria eh xuyoj taqeh palma. Iruqʼor woʼ hoq: «Irukansaj taqeh kar, irukʼat i qatibʼkaal eh iruyoj taqeh rooq haʼ. Maʼxta chik jenoʼ ruwiiʼ reh ruketarik i nufamilia.»

¿CHAJARIK INKʼUTINIK RUUKʼ XKʼULJIK? Reʼ taqeh inkitzʼir riij i wilih, inkiqʼor chi chuʼnchel taqeh haabʼ inkutarik pan palaaw waqiibʼ millón chi botella, nailo eh xa chibʼih jarik. Eh reʼ wilih inchahmik haabʼ reh chi ne insahchik kiwach. Reʼ taqeh wilih iruyoj wach i akʼal. Eh reʼ taqeh kʼachareel maʼxta inkibʼan reh chi ne­inkikanaʼ ruyojarik wach i akʼal. Reʼ taqeh inkitzʼir riij i wilih inkiqʼor chi reʼ akʼal koruman chi ne ruʼakʼbʼisaj riibʼ ruukʼ jenaj haabʼ hoʼoobʼ poh reʼ ruchʼuwaʼrisam wach i kʼachareel chuwach i jenaj haabʼ. «Mi reʼ taqeh kʼachareel maʼ inkikanaʼ ta ruyojarik wach i akʼal mareh ne chik inqaaj jenoʼ chik qakʼal pan haabʼ 2035», iruqʼor i huuj reh Australia Sydney Morning Herald.

REʼ INKIQʼOR I JUʼJUN. Reʼ kʼachareel wilik runaʼojbʼal reh rukorsjik wach i akʼal.

¿MI KORIK INKIQʼOR? Ruum i kikamaj taqeh i kimolwik wach i botella, huuj, lata, eh juʼjun chik taqeh kʼachareel kitobʼinik reh chi reʼ kʼaxkilaal maʼ innimbʼik ta wach. Xa reʼ laʼ reʼ kʼaxkilaal wilih wach akʼal xnimbʼik chik wach.

¿CHAJARIK INAQʼOR I HAT? ¿Koruman na chi reʼ Dios ne rusach­kiwach i kʼahchiʼ kiyojom i akʼal jeʼ rukabʼ ruqʼorom cho rubʼiral?

Atoobʼ ta qilom chik i hoʼoobʼ qʼorooj cho rubʼiral, reʼ Santo Laj Huuj xuqʼor woʼ hoq juʼjun taqeh i holohik narukʼuljik pan tzʼapaabʼ wach ree qʼiij. Qil jenaj ehtalil.

[Re’ taqeh q’orik koruman]

«Qʼeʼ naq holohik i wilkiin wiiʼ xa reʼ laʼ yuʼnaak maʼ holohik ta chik» (REʼ WILIH IRUQʼOR I ERIN TAMBER, IMPATINIK PAN COSTA SUR REH ESTADOS UNIDOS, CHI RIIJ NOQ XCHIHKIK I PETRÓLEO PAN 2010 AR PAN GOLFO REH MÉXICO)

[Re’ cuadro]

¿Rumahk na i Dios chuʼnchel taqeh kʼaxkilaal wilih?

Ruum chi reʼ Dios xuqʼor cho rubʼiral chuʼnchel taqeh i kʼachchiʼ qilom yuʼnaak, ¿iraaj na ruqʼorom chi rumahk i Dios noq inqakʼul i tiʼ kʼaxik? Ne nawehtʼaliij chi riij i wilih pan capítulo 11 reh i huuj ¿Qué enseña realmente la Biblia?, keh taqeh testigo reh Jehová

[Ehtalil re’ taqeh xi’esanik cho reh]

U.S. Coast Guard photo