Kwaghôron u Profeti 5. Ior Mba Vihin Ikyasen I tar

‘[Aôndo una] tim mba ve lu vihin tar la.’—MPASE 11:18.

● Orgen iti na ér Pirri, dughun ityo hen anijiir ugen, mba yer ér Kpor, shin Niger Delta, ken tar u Nigeria. Er i dughun mkuren hen ijiir ne yô, yange mkurem due kpishi kua vihi akaa her, nahan kpenga na cii saa ishe. A kaa ér, “Mkurem wua ishu i se kôron la, shi ma vihi se kwavyolough, shi ma vihi se mngerem. M kera ngu a kwagh ugen môm u zuan a inyaregh sha mi ga.”

IMBAKWAGH NE NGI EREN SHA AJIIR AGEN KPA? Mbatôvon sha akaa kaa ér, hanma inyom yô, ka i haa ihyôghonov shin utyeku mba sha tar je, a aluer i zom cii yô, mbia iv shin ugongolo 393,113 poo poo, je kpa mbia neer ken inya. Man ihyôghonov mbira kpishi ka i lu akaa a i er sha roba, a aa fatyô u kuan shin mnger anyom uderi imôngo cii aa mase vurun been yô. Dugh igbenda i vihin tar i se ter ne sha yô, akaa agen kpishi a tar u ne se, er imendenev shin ikyon nahan, uumace er kwagh a mi gbaan je yô, nga nôngon u been sha tar. Igbenda i i tôv sha kwagh ne yô, tese ér akaa a uumace ka ve vihi ken inyom i môm tseegh, ka i gba u saa shighe a kar a kuma er inyom i môm man iwer itian nahan cii ve, tar shi ua hide a lu a akaa shon ye. Pipaabaver igen ken tar u Australia (Sydney Morning Herald) kaa ér, “Aluer ior za hemen u seer iyenge sha tar shi i pande u vihin akaa a tar u nan se la ga zan zan ar ken inyom i 2035 yô, a gba u a seer zuan a tar ugen u gbangese er tar u se tem sha u ne nahan, a hingir itiar ihiar, ve se za hemen u lun uma ye.”

KA NYI IOR KPISHI KA VE ÔR U NYIMAN IKYAV I KWAGH NE? Uumace mba a kwaghfan shi vea fatyô u keren igbenda i sôron mbamzeyol vev. Se fatyô u yangen mbamzeyol mban, nahan tar ua lu her doo doo.

KWAGH U KA VE ÔR NE KA MIMI JE KPA? Ior kpishi kua iniongo igen ngi nôngon kpoghuloo sha u wasen ior ér ve fa akaa a a ne ve tar u lu vihin la. Nahan kpa, ior mba eren akaa a vihin ikyasen i tar ne her kpoghuloo je.

U NENGE NENA? Ityôkyaa ngi i Aôndo una tim mba ve vihin tar la ér u lu her dedoo, er a tende zwa nahana?

Dugh akaaôron a profeti a ataan a se lam sha mi ne kera yô, Bibilo tsenga ôron akaa a dedoo kpaa, a aa lu eren ken ayange a masejime ne yô. Ikyav i tesen yô, nenge kwaghôron u profeti u sha ataratar, ken ngeren u a dondo ne.

[Mkaanem ma]

“Ka inja er m tee ya wam u doon ashe tsung, m va maa ya hen ijiir i haan ihyôghonov mbi bov nahan.”—Mkaanem ma kwase ugen, iti na ér ERIN TAMBER, YA NA NGU IKYUA A ITYEKU, APE I DUGHUN MKUREM VEGHER U SHIN ITYÔTAR I TAR U AMERIKA LA; YANGE ÔR KWAGH NE SHIGHE MKUREM DUE KEN INYOM I 2010 KUA VIHI AKAA HEN IJIIR NA YÔ.

[Ngeren u kiriki]

Ka Aôndo a Ne Kwagh a Lu Nahan Yee?

Er akaa a vihin a a lu eren nyian se lu nengen ne cii i lu Bibilo yange i tsenga ôron yô, kwagh la tese ér ka Aôndo a ne akaa a vihin shon a lu eren yee? Ka un a lu eren se ican yee? U fatyô u zuan a mlumun sha mba mbampin mban ken takeda u Bibilo Tese Ér Nyi Jimi? la, ityough ki sha 11 kira ka Mbashiada mba Yehova ve gber u ye.

[Ape i zough a foto]

Foto u U.S. Coast Guard