Uchimi 5. Kunanga Charu

‘Chiuta wazamunanga wo ananga charu chapasi.’—CHIVUMBUZI 11:18.

● Ada anyaki zina lawu a Pirri achita bizinesi yakupanga moŵa kutuwa kuvimiti vinyaki va mugulu la kantchindi mumuzi wa Kpor ku Nigeria. Bizinesi yawu yikusere pasi chifukwa cha mafuta ngo ngadika bwekabweka muchigaŵa cha Niger Delta ko ayengetuwa mafuta. Yiwu anguti: “Mafuta yanga ngabaya somba, ngananga khungu lidu kweniso misinji. Sonu ndisoŵa pakuko.”

KUMBI MAUKABONI NGALONGONJI? Akaswiri anyaki akamba kuti vimalala vakukwana matani pafufupi 6.5 miliyoni vidilika munyanja pacharu chosi pa chaka. Ndipu hafu ya vimalala venivi vija vapulasitiki vo vito vyaka mahadiredi nganandi kuti vivundi. Kusazgiyapu pa kunanga charu, ŵanthu amala so vinthu vachilengedu mwaliŵi ukongwa. Kafukufuku walongo kuti, pakhumbika vyaka vinkhondi kuti charu chiweziyepu vinthu vo ŵanthu agwiriskiya ntchitu mu chaka chimoza. Nyuzipepala yinyaki ya ku Australia yingukamba kuti: “Asani chiŵerengeru cha ŵanthu ndipuso mo tigwiriskiya ntchitu vinthu vachilengedu vilutiriyengi kukwera nge mo viliri sonu, tazamukhumbika malu ngakuyanana ndi Vyaru viŵi chichifika chaka cha 2035.”—Sydney Morning Herald.

VO ŴANTHU ANANDI AKAMBA PAKUSUSKA UCHIMI UWU Taŵanthu te ndi zeru ndipu tinganozga vinthu. Tinganozga vo vikunangika pacharu ndipu tingachiweze so po chenge.

KUMBI FUNDU YENIYI NJAKUVWIKA? Ŵanthu anandi aphamphu ndipuso mawupu nganandi ngayesesa kuvikiliya chilengedu. Chinanga kuti veviyo, ŵanthu anandi so ukongwa alutirizga kunanga charu.

KUMBI YIMWI MUWONA WULI? Kumbi muwona kuti Chiuta waseleriyepu waka kuti wataski charu ichi kuti chileki kunangika, nge mo wakulayizgiya?

Kusazgiyapu pa mauchimi ngankhondi ngo takambiskana, Bayibolu lingukambiya so limu vinthu vinyaki vakukondwesa vo vichitika mazuŵa nganu ngakumaliya. Wonani chakuyeruzgiyapu chimoza mu uchimi wa nambala 6.

“Pakwamba ndawonanga nge ndija muparadayisu, kweni sonu ndiwona nge ndija kumutaya.”

—ERIN TAMBER, YO WAJA KU GULF COAST, KU UNITED STATES, WANGUKAMBA VENIVI MAFUTA NGATI NGADIKA BWEKABWEKA MU 2010 KU GULF OF MEXICO.

[Bokosi]

Kumbi Chiuta Ndiyu Wachitiska Venivi?

Pakuti Bayibolu lingukambiya limu masuzgu ngosi ngo tikumana nangu mazuŵa nganu, ndikuti Chiuta ndiyu watingachitiska? Kumbi iyu wachitiska kuti tisuzgikengi? Mungasaniya kwamuka kwa mafumbu ngenanga mu mutu 11 wa buku lakuti Kumbi Bayibolo Lisambizanji Weniukongwa? lo likupharazgika ndi Akaboni aku Yehova.

[Mazu ngakukonkhoska chithuzi]

U.S. Coast Guard photo