Tagna 5. Pagbungkag han Tuna

‘An Dios magbubungkag ha mga nagbubungkag han tuna.’​—PAHAYAG 11:18.

● Hi Mr. Pirri usa nga parapananggot nga taga-Kpor, Nigeria. An iya pakabuhi nadaot tungod han damu nga krudo nga nahuwad ha Niger Delta. “Namatay an mga isda, nadaot an amon panit, ngan nagin mahugaw an amon mga sapa,” siring niya. “Waray na ako pakabuhi.”

ANO AN IGINPAPAKITA HAN MGA REPORT? May mga eksperto nga nasiring nga 6.5 ka milyon ka tonilada nga basura an nahingangadto ha kadagatan han kalibotan kada tuig. Ginbabanabana nga 50 porsyento hito nga basura an plastik, ngan ginatos ka tuig pa ito nga maglulutaw-lutaw antes matunaw. Labot la han pagdaot han tuna pinaagi han polusyon, madagmit liwat hinduro nga nauubos han mga tawo an natural nga mga produkto hito. Iginpapakita han mga pag-aram nga an tuna nagkikinahanglan hin usa ka tuig ngan lima ka bulan basi mabawi an ginkukonsumo han mga tawo ha sulod han usa ka tuig. “Kon magpapadayon an pagtikadamu han mga tawo ngan han ira nakukonsumo, magkikinahanglan na kita hin duha nga Tuna pag-abot han 2035,” siring han dyaryo ha Australia nga Sydney Morning Herald.

ANO AN KOMON NGA PAGRIWA? An mga tawo may abilidad ha pagsulbad hin mga problema. Kaya naton solusyonan ini nga mga problema ngan talwason an tuna.

MAKATADUNGANON BA ITO NGA PAGRIWA? Damu nga tawo an nagbubuhat han ira pinakamaopay basi mapaundang an polusyon. Pero padayon la gihapon nga nagtitikagrabe an polusyon ha tuna.

ANO HA IMO PAGHUNAHUNA? Kinahanglan ba manginlabot an Dios basi talwason an aton planeta​—sugad han iya iginsaad nga bubuhaton?

Labot la han lima nga tagna nga aton ginhisgotan, an Biblia nagtagna nga magkakaada liwat mag-opay nga panhitabo ha kataposan nga mga adlaw. Kitaa an usa hini ha ikaunom nga tagna.

[Blurb]

“An akon gutiay nga tuna nga sugad hin paraiso hadto nagin sugad na hin tambakan hin makahirilo nga basura yana.”​—ERIN TAMBER, RESIDENTE HAN GULF COAST, UNITED STATES, NGA NAGHIHISGOT HAN EPEKTO HAN KRUDO NGA NAHUWAD HA GULF OF MEXICO HAN 2010.

[Kahon]

An Dios ba an Angay Basulon?

Tungod kay igintagna han Biblia an magraot nga kahimtang nga aton naieksperyensyahan yana, karuyag ba sidngon nga an Dios an nagpapahinabo hito? Hiya ba an hinungdan han aton pag-antos? Makakabiling ka hin makapatagbaw nga mga baton hito nga mga pakiana ha kapitulo 11 han libro nga Ano an Igintututdo ha Aton han Biblia? nga iginpublikar han mga Saksi ni Jehova.

[Ginkuhaan han retrato]

Retrato han U.S. Coast Guard