Hɛrɛ bɛna sigi sani dɔɔnin cɛ!

“Sɔɔni mɔgɔ jugu tɛna ye tun . . . Nka dugukolo na kɛ mɔgɔ sabalilenw ciyɛn ye, u na jiidi kosɛbɛ.”—ZABURUW 37:10, 11.

Yala i b’a fɛ nin kiraya kuma ninnu ka waleya wa? Siga t’a la ko o bɛ diya i ye. Kun jɔnjɔnw bɛ yen minnu b’a to an bɛ se ka d’a la ko nin kumaw bɛna waleya sani dɔɔnin cɛ.

Barokun minnu tɛmɛnna, olu kumana kiraya kuma damadɔ dɔrɔn kan minnu b’a jira ka jɛya ko an bɛ “laban donw na.”(2 Timote 3:1-5) Ala ye Bibulu sɛbɛnbagaw ɲɛminɛ ni a ka hakili senu ye u ka o kiraya kuma ninnu sɛbɛn walasa an ka se ka jigiya sɔrɔ. (Romɛkaw 15:4) O kiraya kuma ninnu waleyali b’a jira ko gɛlɛya minnu bɛ an kan sisan, ko olu bɛna ban sani dɔɔnin cɛ.

Mun de bɛna kɛ laban donw kɔfɛ? Ala ka Masaya bɛna hadamadenw bɛɛ mara. (Matiyu 6:9) Ni o waati sera, ɲɛnamaya bɛna kɛ cogo min na, a lajɛ Bibulu bɛ min fɔ o ko la:

● Kɔngɔ bɛna ban. “Sɛnɛfɛnw ka caya o jamana kɔnɔ fo ka se kuluw san fɛ.”—Zaburu 72:16.

● Banaw bɛna ban. ‘Mɔgɔ si tɛna a fɔ ko: “Ne man kɛnɛ.”’—Isayi 33:24.

● Dugukolo bɛna lakuraya. “Kungokolonba ni dugukolo lankolon na ɲagali, jamana jalan na ɲagalikan bɔ i ko baga feere.”—Isayi 35:1.

Ninnu ye Bibulu kiraya kuma damadɔ ye minnu bɛna waleya sɔɔni, wa o bɛ dusu don an kɔnɔ. Jehova Seerew dalen b’a la ko hɛrɛ bɛna sigi dugukolo kan sɔɔni, ni a ka di i ye, i bɛ se ka u ɲininka u k’a jira i la mun na u dalen bɛ o la.