A Ṭha Deuhmi Hmailei Caan

“Luklak ah miṭhalo cu an lo ko lai . . . Sihmanhsehlaw mi toi ah aa dormi cu ram chungah hin him tein an um lai i daihnak kha tlamtling tein an hmuh lai.”​—SALM 37:10, 11.

A CUNGLEI ah langhtermi chimchungbia a tlin lai caan kha hmuh na duh maw? Na duh lai ti cu a fiang ko. A ruahhlan ah mah chungchungbia hna a tling cang lai ti kha zumh awkah a ruangṭha hna a um.

A hmasa capar ah “ni hmanung bik” ah kan nung ti a langhtermi chimchungbia cheukhat kong kan i ruah cang. (2 Timote 3:​1-5) Ruahchannak kan ngeih khawh nakhnga Pathian nih mah chimchungbia hna kha Baibal chungah khumh dingin Baibal ṭialtu pawl kha a fial hna. (Rom 15:4) Mah chimchungbia hna a tlinmi nih atu ah kan tonmi harnak hna cu a rauhhlan ah hrawh a si cang lai ti kha a langhter.

Ni hmanung bik a dong tikah zeidah a cang lai? Pathian Pennak nih minung kha a uk hna lai. (Matthai 6:9) Mah caan a phanh tikah vawlei ah a cang dingmi thil sining kong he aa tlaiin Baibal ah a langhtermi kong kha zohhmanh hna u sih:

● Mangṭam a um ti lai lo. “Ram [vawlei, NW] chungah rawl tampi in um ko seh . . . Ramlak i a khomi ram bantuk in khuapi cu minung in khat hna seh.”​—Salm 72:16.

● Zawtnak a um ti lai lo. “Kan ram i a ummi cu ‘ka zaw’ tiah an zai ti lai lo.”​—Isaiah 33:24.

● Vawlei cu a thar in remh ṭhan a si lai. “Ramlak le ramcar hna cu an i lawm lai i thetse ram cu a par lai.”​—Isaiah 35:1.

Mah hna hi a rauhhlan ah a cang dingmi thazaang a pemi Baibal chimchungbia tlawmpal lawng an si. Jehovah Tehte Hna kha hmailei ah a ṭha deuhmi caan a phan cang lai tiah zeicah nan zumh ti kha hal hna.