Gauna Totoka sa tu qo e Matada!

“Malua mada vakalailai, ena qai takali na tamata ca; . . . Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.”—SAME 37:10, 11.

O VIA raica na vakayacori ni parofisai qori? Sega ni vakatitiqataki ni vaka kina. E tiko na vuna vinaka mo vakabauta ni sa voleka sara ni vakayacori.

E vakamacalataki ena vica na ulutaga sa oti eso ga na parofisai vakaivolatabu e dusia vakamatata nida sa bula tu qo ena “iotioti ni veisiga.” (2 Timoci 3:1-5) Na Kalou a uqeti ira na vola na iVolatabu mera parofisaitaka qori me noda kina na inuinui. (Roma 15:4) Na vakayacori ni parofisai va qori e vakaraitaka ni sa vakarau oti na leqa eda sotava tu nikua.

Na cava ena salamuria mai na iotioti ni veisiga? Ena liutaka na kawatamata na Matanitu ni Kalou. (Maciu 6:9) Raica mada na ka e tukuna na iVolatabu me baleta na bula e vuravura ena gauna oya:

● Oti na viakana. “Ena sa tu e vuravura e na dela ni veiulu-ni-vanua na sila e qumi rawarawa ga.”—Same 72:16.

● Sega na tauvimate. “Na lewe ni koro ena sega ni kaya, ka’u sa tauvi mate.”—Aisea 33:24.

● Ena vakavoui na vuravura. “Ena reki e na vuku ni ka oqo na lekutu kei na vanua dravuisiga; ia na vanua liwa lala ena marau, ka se me vaka na rose.”—Aisea 35:1.

Qori e vica ga na parofisai veiuqeti ena iVolatabu e sa voleka ni vakayacori. O rawa ni kerei ira na iVakadinadina i Jiova mera vakamacalataka na vuna era nuidei kina ni sa tu qo e matada e dua na gauna totoka.