Ojlẹ Dagbe lẹ To Yakẹ!

“Na whenu pẹẹde dogọ, mẹylankan lẹ ma na tin ba . . . Ṣigba, homẹmimiọnnọ lẹ wẹ na dugu aigba tọn, yé nasọ nọ mọ awuvivi susu to jijọho susugege mẹ.”​—SALMU LẸ 37:10, 11.

BE E na jlo we nado duvivi hẹndi dọdai he to wefọ he yin sislẹ to aga ehe mẹ tọn ya? E họnwun dọ mọwẹ. Whẹwhinwhẹ́n dolido lẹ tin nado kudeji dọ e na mọ hẹndi to madẹnmẹ.

To hosọ he wayi lẹ mẹ, mí dọhodo dọdai Biblu tọn vude poun ji, he dohia dọ mí ko to gbẹnọ to “azán godo tọn lẹ mẹ.” (2 Timoti 3:1-5) Jiwheyẹwhe gbọdo Biblu-kantọ lẹ nado dọ nujijọ enẹlẹ na mí jẹnukọn, na mí nido sọgan hẹn todido go. (Lomunu lẹ 15:4) Hẹndi dọdai enẹlẹ tọn yin kunnudenu lọ dọ opodo oyà he ji mí te to egbehe lẹ tọn ko sẹpọ.

Etẹwẹ na jọ bọdo azán godo tọn lẹ go? Ahọluduta Jiwheyẹwhe tọn na dugán do gbẹtọvi lẹpo ji. (Matiu 6:9) Pọ́n lehe Biblu dọ dọ nulẹ na wá te to aigba ji to whenẹnu:

● Huvẹ ma nasọ tin gbede ba. “Jinukun susugege na tin to aigba ji; e na gọfla to osó lẹ ji aga.”—Salmu lẹ 72:16.

● Azọ̀n na busẹ mlẹnmlẹn. “Depope to mẹhe nọ nọ̀ aigba lọ ji lẹ mẹ ma na dọmọ: ‘N’to azọ̀njẹ.’”—Isaia 33:24.

● Aigba na yin hinhẹn jẹ yọyọ. “Danfafa po aigba-klo po na jẹaglin, bọ dankló na jaya bo na gbàsẹ́ di vounvoun gbémẹ tọn.”—Isaia 35:1.

Vude poun to dọdai Biblu tọn tulinamẹ tọn he na mọ hẹndi to madẹnmẹ lẹ mẹ niyẹn. Be e ma na yọ́n dọ a ni biọ to Kunnudetọ Jehovah tọn lẹ si nado dohia we nuhewutu yé do kudeji sọmọ dọ ojlẹ dagbe lẹ to yakẹ ya?