Oruyaveze oruwa ru ri popezu

“Mokaruveze okasupi omurunde tjandje ke tji po . . . Ovanandjenda mave rumata ehi, nu mave vyarere ohange onene.”—EPSALME 37:10, 11.

HAPO mo zeri okumuna omaprofetero nga tamunwa kombanda mba tji maye yenenisiwa? Otjiperi kutja mo zeri nao. Pe nomapu omananḓengu ngu maye tjiti kutja tu kare nongamburiro kutja owo maye yenenisiwa moruyaveze rwa tjimanga.

Otupa tu twa kapita, twa hungirire komaprofetero tjiva wOmbeibela nga raisa oukahu kutja tu hupa “momayuva omasenina.” (2 Timoteus 3:1-5) Mukuru wa hinga ovatjange wOmbeibela okuhunganeka ohunga novitjitwa mbyo kokutja eṱe tu kare nomaundjiro. (Ovaroma 15:4) Omayenenisiro womaprofetero ngo ye raisa kutja omauzeu ngu tu muna maye ya kondjandero.

Ovikwaye mbi mavi katjitwa kombunda yomayuva omasenina? Ouhona wa Mukuru ma u honaparere po ovandu avehe. (Mateus 6:9) Tara omuano Ombeibela mu i hungira ohunga noviṋa mbi mavi katjitwa kombanda yehi:

● Kape nokukakara ondjara rukwao. “Ngamu kare ovikokotwa ovingi mehi nga kozondomba zozondundu; ovyo ngavi takavare.”—Epsalme 72:16.

● Kape nokukakara omitjise rukwao. “Nu kape nomundu ngwa tura mehi retu, ngu ma unauna rukwao kutja eye wa vera.”—Jesaja 33:24.

● Ehi mari yarurwa koupe. “Okuti ku ku ri tjo nu ku kwa kukuta maku nyanda, nokuti onguza maku yoroka nu aku nyomoka otja ongara.”—Jesaja 35:1.

Inga omaprofetero tjiva wOmbeibela ngu maye yenenisiwa moruveze rwa tjimanga. Ongwaye tji u hi nokupura Ovahongonone va Jehova okukuraisira kutja omena raye tji ve kambura kutja oruyaveze oruwa ru ri popezu?