Aranni Ngana I Mas Makasta nga Tiempo!

“Ta ari nga mabbayag, i marakay ira ay mapawan . . . ngem i minappakalinno ay irensiad-da i davvun, anna mattolay ira ta imammo nga mannanayun.”​—SALMO 37:10, 11.

KAYÀ mu kari nga masingan nga matuppal i profesiya ta Salmo 37:10, 11? Magga kayà mu. Aru i rason tapenu mangurug ka tatun.

Nepakanawag ta nappasa ira nga artikulo i karuan ta profesiya ta Biblia nga mamakurug nga mattolay ittam ngana ta “pangurianan ira nga aggaw.” (2 Timoteo 3:1-5) Inusa na Dios i totolay tapenu itura danatun nga profesiya nga mamaggiddanama nittam. (Roma 15:4) Ipasingan na ketuppalan natun ira nga profesiya nga aranni ngana nga mawawan i problema tam ira.

Anni i tumunug ta pangurianan ira nga aggaw? Immagurayan noka na Pappatulan na Dios i ngamin nga totolay. (Mateo 6:9) Segun ta Biblia, kunnaw noka i paddia-paddian ta davvun tatun nga tiempo:

● Awan ngana noka tu mabisin. “Aru paray i magatab ta koman ira; matakkabban paray i kavukiran ta mula-mula.”​—Salmo 72:16.

● Mapawan ngana noka i taka-taki. “Awan noka tu maski sinni nga mangikagi: ‘Mataki ngà.’”—Isaias 33:24.

● Mapakarenuan noka i planeta nga davvun. “Magayayya noka i tana-tana anna i mamaga nga davvun, Ay mappalupagia noka i disierto anna mallappaw nga kagitta na safron.”​—Isaias 35:1.

Karuan laman danatun ta makapagaram ira nga profesiya ta Biblia nga aranni ngana nga matuppal. Puede nga ipakanawag nikaw na Saksi ira ni Jehova nu ngatta makasiguradu ira nga aranni ngana i mas makasta nga tiempo.